Mańǵystaýda aýyl ákimdigi Kaspıı teńizi jaǵalaýynan 250 tonna qoqys jınaǵan

AQTAÝ.QazAqparat - Mańǵystaýda Saıyn Shapaǵatov aýyly ákimdigi eki aıdyń ishinde jaǵalaýdan 250 tonna qoqys jınaǵan. Olar turǵyndardyń demalý mádenıetiniń azdyǵynanKaspıı teńiziniń jaǵasy qoqys polıgonyna aınalǵanyna qynjylady, dep habarlaıdy QazAqparat tilshisi.

Saıyn Shapaǵatov aýyly ákimdigi Kaspıı teńiziniń eldimeken jaǵalaýynan, 43-shaqyrymdaǵy jáne 68-shaqyrymdaǵy «Golýbaıa býhta» jerinen eki aıdyń ishinde 250 tonna qoqys jınaǵan.

«Jaǵalaýdy apta saıyn tazalaýǵa týra kelip otyr. Óıtkeni demalýshylar qoqys tastap, qorshaǵan ortany búldirip ketedi. Tipti turmystyq qaldyqtan aıaq alyp júrý múmkin bolmaı qalady. Sondyqtan ákimnen bastap, kishi qyzmetkerge deıin 10-15 maman tazalyq jumystaryn júrgizýge májbúr», - deıdi Saıyn Shapaǵatov aýyly ákiminiń orynbasary Ǵıbrat Muhambet.
Saıyn Shapaǵatov aýylyna jaqyn ornalasqan Aqshuqyr aýylyndaǵy jaǵalaýdan da aptasyna 1 tonna qoqys shyǵarylady.
«Demalýshylardan qalǵan qoqysty kommýnaldyq qyzmettiń 80 jumysshysy kún saıyn tańerteńnen keshke deıin tazalaıdy. Qoqys jáshikteri kúnine eki ret tógiledi», - deıdi ol.