Mańǵystaýda aýrýhanada emdelip jatqan 1025 naýqas daýys berý múmkindigine ıe boldy
Mańǵystaý oblystyq qoǵamdyq kommýnıkatsııa ortalyǵy taratqan málimetke súıensek, Mańǵystaý oblystyq aýrýhanasy – 253, oblystyq perınataldyq «Ana men bala» ortalyǵy – 265, al qalǵan 507 saılaýshy oblystyq kópbeıindi balalar aýrýhanasy, Aqtaý qalalyq perınataldyq ortalyǵy, modýldik ınfektsııalyq statsıonar jáne «Archımed» medıtsınalyq klınıkasynda daýys beredi.
№ 41 saılaý ýchaskesiniń tóraǵasy Nádirqoja Mýsaevtyń aıtýynsha, saılaý kezinde belsendilik joǵary ekendigi baıqalady.
Tártipti qamtamasyz etý úshin polıtsııa qyzmetkerlerine kezekshilik uıymdastyrylǵan jáne eki jerge beınekamera ornatylǵan.
Saılaý ýchaskesinde tóraǵa, onyń orynbasary, hatshy jáne komıssııa músheleri bar.
Aıta ketý kerek, aýrýhanalarda jatyp em-dom qabyldap jatqan naýqastarǵa komıssııa músheleri saılaý jáshigimen palatalaryna baryp, daýys berýine múmkindik jasady.
«Mańǵystaý oblysy boıynsha densaýlyq saqtaý mekemeleri saılaýǵa tyńǵylyqty daıyndalǵan. Aqtaý qalasynda ornalasqan oblystyq aýrýhanada № 41 saılaý ýchaskesi óz jumysyn tańerteń saǵat 07:00-de bastady. Em qabyldap jatqan naýqastarǵa barlyq jaǵdaı jasalǵan. Antıseptık pen betperde taratyldy» dedi ol.
Óz múmkindigin paıdalanǵan analardyń biri - Áıgerim Myrzabaıqyzy oblystyq perınataldyq ortalyqta kúni keshe tuńǵysh sábıin ómirge ákeldi.
Onyń aıtýynsha, saılaýǵa belsendi qatysý árbir adamnyń azamattyq paryzy.
«Saılaýshylarǵa «Ana men bala» ortalyǵynda barlyq jaǵdaı jasalǵanyn aıta ketkim keledi. Ásirese qazirgi pandemııa jaǵdaıynda ınfektsııalyq aýrýdyń aldyn-alý boıynsha profılaktıkalyq sharalarǵa kóbirek mán berilgen. Sol úshin osy mekemege alǵys aıtamyz, óz tańdaýym boıynsha daýysymdy berdim, barlyq saılaýǵa qatysýshylarǵa sáttilik tileımin», - dedi ol.