Mańǵystaýda aýdan ákimdiginiń qyzmetkeri basshylaryn ıissýmen «satyp almaq» bolǵan - VIDEO
Aıta keteıik, vıdeoda Munaıly aýdandyq kásipkerlik jáne aýyl sharýashylyǵy bólimi basshysynyń mindetin atqarýshy Bahtııar Qýanyshbektiń áriptesterimen áńgimesi jazylǵan. Al sol vıdeoda attary atalǵan oblystyq basqarmanyń eki basshysy «bul vıdeojazba sybaılas jemqorlyqqa shaqyrady» dep quzyrly orynǵa aryz-shaǵym túsirdi.
«Bólim qyzmetkerleri «Sybaılas jemqorlyqqa qarsy is-qımyl týraly» zańdy elemeı, basshylarynyń áńgimesin tyńdap otyrǵan. Bul áreket qylmystyq jaýapkershilikke ákep soǵady. Al memlekettik qyzmetshi B.Qýanyshbektiń áńgimesi tipti áıelderdiń ar-namysy men qadir-qasıetine nuqsan keltiredi. Osynyń bárin eskere otyryp, oblystyq kásipkerlik jáne saýda basqarmasynyń basshysy J.Toqbaeva men ınvestıtsııalar jáne týrızmdi damytý basqarmasynyń basshysy V. Mustapaeva ýákiletti organdardan «Sybaılas jemqorlyqqa qarsy is-qımyl týraly» Zańy men «QR memlekettik qyzmetshileriniń etıkalyq normalary men minez-qulyq qaǵıdalaryn odan ári jetildirý jónindegi sharalar týraly» Kodekske súıene otyryp, B. Qýanyshbekke qatysty qatań shara qabyldaýdy suraıdy. Sonymen qatar, olar memlekettik qyzmetshilerdiń ádep kodeksin buzǵany úshin vıdeodaǵy bólim qyzmetkerlerine de qatań shara qoldanýdy talap etedi», - delingen oblystyq ákimdik taratqan baspasóz relızinde.
Aryzda, sondaı-aq, áleýmettik jelide moraldyq zalal keltirgeni úshin aıyppul salý jáne resmı keshirim suraý qajettigi aıtylǵan. Qazirgi ýaqytta bólim basshysynyń mindetin atqarýshy B.Qýanyshbekke qatysty qyzmettik tekserý bastaldy.
Aıta keteıik Bahtııar Qýanyshbek osydan 1 jarym aı buryn Munaıly aýdandyq kásipkerlik jáne aýyl sharýashylyǵy bólimi basshysynyń m.a. qyzmetine taǵaıyndalǵan bolatyn.