Mańǵystaýda attan qulaǵan balaǵa kranıoplastıka operatsııasy jasaldy

AQTAÝ. QazAqparat - Jańaózen qalasyndaǵy kópbeıindi aýrýhanada alǵash ret mıyna zaqym kelgen 15 jasar balaǵa kranıoplastıka neırohırýrgııalyq ota jasaldy, dep habarlaıdy QazAqparat tilshisi.

Naýqas Jańaózen qalalyq kópbeıindi aýrýhanasyna shuǵyl túrde mıynan zaqym alyp túsken. Bala attan qulap, samaı súıegi synǵan.

«Naýqas qyrkúıek aıynda jylqydan qulap, jaraqat alyp, jedel túrde Jańaózen qalalyq kópbeıindi aýrýhanasyna kelip tústi. Tekserý kezinde, bas mıynyń epıdýraldy gematomasy, samaı súıeginiń synýy anyqtalyp, dereý ota jasaldy. Alǵashqy ota sátti ótip, keıin ambýlatorlyq emge jiberildi. Naýqas osy naýryz aıynda ekinshi josparly otasyna kelip tústi. Qazirgi tańda balanyń jaǵdaıy jaqsy, ambýlatorlyq emin qabyldap jatyr», - dedi emdeýshi dárigeri neırohırýrg Meırambek Dabysbaı.

Dárigerlerdiń aıtýynsha, bul kúrdeli ota óńirde alǵash ret jasalǵan.