Mańǵystaýda anasy men qyzynyń ólimine sebepshi bolǵan dezınsektor 5 jylǵa sottaldy

AQTAÝ. QazAqparat – Mańǵystaýda ana men qyzdyń ólimine sebepshi bolǵan jándik ýlaý qyzmetin usynǵan azamat sottaldy, dep habarlaıdy QazAqparat tilshisi.

«Sot úkimimen J. eki adamnyń ólimine ákep soqqan sanıtarııalyq qaǵıdalardy, gıgıenalyq normatıvterdi buzǵany úshin QR Qylmystyq kodeksiniń 304-babynyń 3-bóligimen kináli dep tanylyp, 5 jyl merzimge bas bostandyǵynan aıyryldy» dep málim etti Mańǵystaý oblystyq prokýratýrasynyń baspasóz qyzmetinen.

Sottalýshy páterin jándikterden tazartý maqsatynda óziniń tanysyna dezınsektsııa qyzmetin usynady. Osylaısha Qazaqstan aýmaǵynda qoldanýǵa tyıym salynǵan ómirge qaýipti «Kvıkfos» ýyn paıdalanǵan.

Saldarynan aýaǵa «alıýmın fosfıd» tússiz ýly gazy tarap, onyń áserinen kórshi páterdegi jasóspirim qyz ben onyń anasy qaıtys bolǵan.

Osylaısha bir adamnyń nemquraıly áreketi qaıǵyly jaǵdaıǵa sebepker bolǵan.