Mańǵystaýda Amal merekesine oraı Otpan taýda qyryqtan asa kıiz úı tigildi

AQTAÝ.QazAqparat - Mańǵystaýdyń Otpan taý baýraıyndaǵy «Qarashańyraq» kesheninde Amal meıramy keń aýqymda atap ótildi. Birqatar mádenı-tanymdyq is-sharalar uıymdastyryldy, dep habarlaıdy QazAqparat tilshisi.

Amal meıramy aıasynda Otpan taý baýraıyna 42 aqshańqan kıiz úı tigildi. Bıylǵy sharany laıyqty uıymdastyrý úshin jaýapkershilikti Tobysh ata urpaqtary alǵan bolatyn.

«Bul meıram bizge ata-babamyzdan mura bolyp jetken. Ásirese kishi júz qazaqtary úshin 14 naýryz - Amal merekesi, jergilikti halyq arasynda Kórisý kúni erekshe atap ótiledi. Ózimizge tapsyrylǵan mindetti abyroımen, jaqsy atqarýdamyz degen senimdemin», - dedi uıymdastyrýshylardyń biri Qalnııaz Ońdabaı.

Sondaı-aq meıram aıasynda qolóner sheberleriniń buıymdarynan kórme uıymdastyrylyp, kórermen kózaıymyna aınaldy. Dýmandy mereke «Astana sazy» folklorlyq ansambliniń kontsertimen jalǵasty.

Jalpy, sharaǵa 10 myńǵa jýyq adam qatysty. Budan bólek estrada ánshisi Jeńis Ysqaqova, dástúrli ánshi Aıgúl Qosanova, Qaraqalpaqstan eliniń ánshisi Jeńisbek Pııazov arnaıy kelip, sahnada óz ónerlerin pash etti.