Mańǵystaýda «Alǵys aıtý» kúnine oraı 100-den asa mádenı shara ótedi

AQTAÝ. QazAqparat – Mańǵystaý oblysynda «Alǵys aıtý» kúnine oraı aýyzbirshilikti, yntymaq pen dostyq qarym-qatynasty nyǵaıtý maqsatynda 100-den astam mádenı shara uıymdastyrylmaq, dep habarlaıdy QazAqparat tilshisi.

«Abaı» atyndaǵy mádenı-demalys kesheninde «Alǵys aıtý – paryzym!» merekelik kontserti men M. Óskinbaev atyndaǵy oblystyq fılarmonııada «Aqshaǵyl» etno-folklorlyq ansambliniń jáne «Jorǵa» bı tobynyń kontserti ótedi.

«N. Jantórın atyndaǵy Mańǵystaý oblystyq mýzykalyq-drama teatrynda «Perzenthana» qoıylymy, 3 naýryz kúni «Otpan» tarıhı-mádenı kesheninde «Aq jaýlyqty ájeler» atty kezdesý keshi, M .Óskinbaev atyndaǵy oblystyq fılarmonııada kishi sımfonııalyq orkestrdiń kontserti uıymdastyrylady», - deıdi Mańǵystaý oblystyq mádenıet, arhıvter jáne qujattama basqarmasy basshysynyń orynbasary Gúlnar Bazaralıeva.

Sonymen qatar, oblystyq mýzeıler men kitaphanalarda «Bul álemdi ádemi etý úshin, jaqsy sózder aıtyńyz» taqyrybynda alǵys aıtý saǵattary, «Alǵys aıtý – paryzym!» kitap kórmesi men «Myń alǵys» erteńgiligi, «Jyly lebiz jan tebirenter» kezdesý keshteri ótedi.

Osyndaı mádenı sharalar Jańaózen qalasy men Munaıly, Qaraqııa, Túpqaraǵan, Beıneý aýdanynda da uıymdastyrylmaq.