Mańǵystaýda áleýmettik toptarǵa 252 grant bólinedi

AQTAÝ. QazAqparat - Mańǵystaýda áleýmettik osal toptaǵy jandardyń kásipkerlik bastamalaryn qoldaý maqsatynda 252 grant bólinedi, dep habarlaıdy QazAqparat tilshisi.

2022 jyldyń qorytyndysy boıynsha, jańa bıznes-ıdeıalardy iske asyrý úshin beriletin granttarǵa bıýdjetten 1,2 mlrd teńge bólinip, 990 adam grant ıegeri atanǵan.

Bıyl da ataýly granttar halyqtyń osal toptarynan shyqqan azamattarǵa 400 AEK- deıingi mólsherde (1 380 000 teńge) jańa bıznes-ıdeıalardy iske asyrýǵa beriledi.

«Konkýrsqa qatysý úshin «Bastaý Bıznes» jobasy boıynsha kásipkerlik negizderin aıaqtaý týraly sertıfıkatyńyz bolýy mindetti. Bul sertıfıkatty kez kelgen ýaqytta skills.enbek.kz platformasynda uzaqtyǵy 14 kúndi quraıtyn onlaın oqý arqyly ala alasyz. Al, grantqa ótinim berý úshin business.enbek.kz portalyna tirkelip, nusqaýlyqqa sáıkes amaldardy oryndaý kerek», - dedi Mańǵystaý oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Áset Shopanov.

Granttar nysanaly maqsaty boıynsha, qajetti eńbek quraldaryn, tehnologııalyq jabdyqty, janýarlardy, maldy, qustardy, kóshetterdi, butalardy, tuqymdardy satyp alýǵa jáne saýda obektilerin jalǵa alýǵa bólinbek.