Mańǵystaýda 500 iri sharýa qojalyǵyna qarjylaı qoldaý kórsetildi

AQTAÝ. QazAqparat - Mańǵystaý oblysyndaǵy 500 iri sharýa qojalyǵy men 6 myńǵa jýyq turǵynnyń tórt túligine qarjylaı qoldaý kórsetildi, dep habarlady QazAqparat tilshisi.

Bul týraly Mańǵystaý oblysy aýyl sharýashylyǵy basqarmasynyń basshysy Serik Qaldyǵul málim etti.

Onyń aıtýynsha, óńir basshysy Serikbaı Trumovtyń bastamasymen qýańshylyqtan zardap shekken sharýalarǵa qarjylaı qoldaý kórsetý úshin úkimet rezervinen 1,9 mlrd. teńge bólindi.

«Aýyl sharýashylyǵy mınıstrliginiń qoldaýymen Úkimet rezervinen Mańǵystaýdaǵy aýyl sharýashylyǵy janýarlarynyń analyq basy úshin mal azyǵyna jumsalǵan shyǵyndardy ishinara óteýge 1,9 mlrd. teńge mólsherinde qaıtarymsyz qarajat bólingen bolatyn.

Qazirgi tańda bólingen qarajattyń 50% ıgerildi ıaǵnı, 5275-ge jýyq jeke qosalqy úı sharýa qojalyqtaryna 611,3 mln. teńge jáne 500 sharýa qojalyǵyna 277,4 mln. teńge qarjylaı memlekettik qoldaý kórsetildi», -dedi ol.

Serik Qaldyǵuldyń málimetinshe, qalǵan 1 mlrd teńge qyrkúıek aıynda ıgerilmek.

Budan basqa óńir sharýalaryna taǵy da aldaǵy qazan-qarasha aılarynda jergilikti bıýdjetten 700 mln. teńge bólý josparlanyp otyr.

«Bul qarajat aýyl sharýashylyǵy mınıstriniń 2019 jylǵy 15 naýryzdaǵy «Asyl tuqymdy mal sharýashylyǵyn damytýdy, mal sharýashylyǵynyń ónimdiligin jáne ónim sapasyn arttyrýdy sýbsıdııalaý qaǵıdalaryn bekitý týraly» № 108 buıryǵyna sáıkes sýbsıdııa retinde berilmek. Qazirgi ýaqytta sharýalardy jem-shóppen qamtamasyz etip, mal azyǵy tapshylyǵyn joıý maqsatynda birqatar jumystar júrgizilip jatyr»,- dedi ol.

Jergilikti bıýdjetten 150 mln. teńge bólinip, «Kaspıı» ÁKK AQ-y arqyly atalǵan qaıtarymdy qarjyǵa 15 shildeden beri ár qala, aýdandardan taǵaıyndalǵan operatorlar qajettiligine qaraı shóp tasymaldap jatyr. Búgingi kúnge deıin 1 myń tonnaǵa jýyq shóp satyp alyndy. Bul jumystar jyl aıaǵyna deıin jalǵasady.

«Jergilikti bıýdjetten 54 mln teńge bólinip, qaıtarymdy qarajatqa aýdandardan taǵaıyndalǵan operatorlar Qostanaı oblysynan 546 tonna arpa jetkizdi. Qazirgi tańda arpa túgel satylyp, aınalymdaǵy qarjyǵa taǵy mal azyǵyn satyp alý jumystary jalǵasyp jatyr»,- dedi S. Qaldyǵul.

Sonymen qatar 107 mln teńgege 15 vagon 3-4 sortty bıdaı (bıdaı qaldyǵy) satyp alyndy. Suranysqa sáıkes aldaǵy onkúndikte turǵyndarǵa usynylady.

Jalpy jyl basynan beri óńirge 37 500 tonna shóp tasymaldandy. (onyń 30 000 tonnasy ózge aımaqtardan, 4 000 tonnasy jergilikti jerden shabyldy). Al 3500 tonna shóp (140 vagon) ózge óńirlerden kómek retinde jetkizilip, qýańshylyqtan zardap shekken mal ıelerine tegin úlestirildi. Al, óńirge tasymaldanǵan jem kólemi 22 myń tonnany qurady.