Mańǵystaýda 50 memlekettik qyzmetker zańbuzýshylyqtarǵa jol bergen

AQTAÝ. QazAqparat - Bıyl Mańǵystaý oblysynyń ádep jónindegi keńes músheleri memlekettik qyzmetke qatysty 63 máseleni qaraǵan. Nátıjesinde 50-deı mamannyń ár túrli zańbuzýshylyqtarǵa jol bergeni anyqtaldy. Bul týraly oblystyq memlekettik qyzmet salasyndaǵy baqylaý basqarmasynyń basshysy Nurbol Doldashev málim etti, dep habarlaıdy QazAqparat.

Atap aıtsaq, 13-i memlekettik satyp alý tártibin, 7-ýi turǵyn-úı bólý tártibin, 3-ýi jer máselesine qatysty zańbuzýshylyqtarǵa jol berse, 3-ýi ádep kodeksi talaptaryn saqtamaǵan. Taǵy 3-i memlekettik kórsetiletin qyzmet tártibin buzǵan, al 17-si basqa da zań buzýshylyqtarǵa jol bergen.

«Ádep jónindegi  keńes músheleri zańbuzýshylyqqa jol bergen 10 adamǵa «qyzmetine tolyq sáıkes emes» degen eskertý berdi. Taǵy 2 memlekettik qyzmetker ornynan bosatyldy. Olardyń biri para alý deregi boıynsha tirkelgen. Sondaı-aq, 12 qyzmetshige ádep  kodeksine sáıkes 8 - eskertý, 2 - «sógis», 2 - «qatań sógis» túrinde jazalar qoldanyldy», - deıdi Nurbol Doldashev.

Keńes músheleri óz kezeginde zańbuzýshylyqqa jol bergen memlekettik qyzmetshilerge qatysty tártiptik isti qaraý barysynda, olardyń qatań jaýapkershiligin qaraýdy usynady. Sebebi 2016 jyldary óreskel zań buzýshylyqtar bolǵan. Máselen, Quryq selosynan qosalqy sharýashylyq júrgizý úshin 51 jer telimin zańsyz bergen azamatqa qatysty is qozǵalyp, nátıjesinde 33 jer prokýratýra organynyń aralasýymen zańdy kúshin joıǵan. Qyzmetker jumystan bosatylǵan. 

Sondaı-aq, Beıneý aýdandyq jumyspen qamtý, áleýmettik baǵdarlamalar jáne azamattyq hal aktilerin tirkeý bóliminiń qyzmetkeri 3 jyl boıy para alý arqyly memleket bıýdjetine jáne azamattardyń zańdy múddeleriniń buzylýyna jol bergendigi anyqtalyp, qyzmetinen qýylǵan.

Mańǵystaý oblysy boıynsha tekserý komıssııasynyń tóraǵasy Murat Eshanqulovtyń aıtýynsha, zańbuzýshylyqty boldyrmaý úshin  kameraldyq baqylaý júıesi engizilýde.