Mańǵystaýda 4 esirtki zerthanasynyń qyzmeti toqtatyldy

AQTAÝ. QazAqparat – Mańǵystaýda sıntetıkalyq esirtki taratý boıynsha 60 Telegram arnasynyń jumysyna tosqaýyl qoıylyp, 4 esirtki zerthanasynyń qyzmeti toqtatyldy. Bul týraly Qoǵamdyq kommýnıkatsııa ortalyǵynda ótken brıfıngte Mańǵystaý oblysynyń prokýrory Rýfat Quttyqov málim etti, dep habarlaıdy QazAqparat tilshisi.

Sıntetıkalyq esirtki taratý boıynsha 93 adam qylmystyq jaýapkershilikke tartylyp, zańsyz aınalymnan 76 kg marıhýana, 21 kg apıyn, 3 kg sıntetıkalyq esirtki alynǵan.

«Budan basqa oblys ákimdigi prokýratýranyń sıntetıkalyq esirtki boıynsha 5 000 dana «Ekspres test» satyp alý týraly usynysyn qoldady.

Oǵan qosa Mańǵystaý oblysynyń sot saraptamasy ortalyǵyna sıntetıkalyq esirtkilerdi shuǵyl anyqtaıtyn apparatýra satyp alýǵa 412 mln teńge qarajat bólindi. Sonymen qatar prokýrorlar halyq arasynda quqyqtyq túsindirý jumystaryn kúsheıtip, áleýmettik jeliler arqyly alaıaqtyqtyń aldyn alý boıynsha belsendi jumys júrgizip keledi. Nátıjesinde alaıaqtyqty 42%-ǵa, onyń ishinde ınternet-alaıaqtyqty 72%-ǵa tómendetýge qol jetkizdik», – dedi Rýfat Quttyqov.

Sondaı-aq spıker brıfıngte memleketke 1,5 mlrd teńgeniń múlki qaıtarylyp, 5 mlrd teńgege úsh zańsyz satyp alýdyń kúshi joıylǵany jaıly aıtyp ótti.

«Biz 600 kásipkerdiń quqyǵyn qorǵap, 900 mln teńgeniń ysyrap bolýynyń aldyn aldyq. Sondaı-aq yqpalymyzben olıgopolııanyń jalpy quny 15 mlrd teńgeden asatyn 220 gektar «altyn ýchaskeleri» memleketke qaıtaryldy. Prokýrorlyq qadaǵalaý sharalarymen alıment boıynsha bereshek 43,3 mln teńgege tómendetildi, 44 boryshker ákimshilik jaýapkershilikke tartyldy, 27-ne qatysty sotqa deıingi tergeý bastaldy. Osy jyly oblys turǵyndarymen kezdesý sany artty. Qoljetimdilikti qamtamasyz etý nátıjesimen 1 104 azamatty qabyldadyq», – dedi Rýfat Quttyqov