Mańǵystaýda 300-den astam túlek UBT kezinde 100-den joǵary ball jınaǵan

AQTAÝ. QazAqparat - Bul týraly óńirlik qoǵamdyq kommýnıkatsııa ortalyǵynda ótken brıfıngte Mańǵystaý oblystyq bilim basqarmasynyń basshysy Asqar Seıdalıev málimdedi, dep habarlaıdy QazAqparat.

Bıyl ulttyq biryńǵaı testileý barlyq sanıtarlyq talaptarǵa saı ótkizildi. Ulttyq biryńǵaı testileýge oblystyń 5736 túlegi qatysýǵa ótinish bergen.

«Oblys boıynsha eń joǵarǵy baldy (138) Munaıly aýdany Qyzyltóbe lıtseıiniń «Altyn belgi» ıegeri Saltanat Quljanova jınady. Sondaı-aq, «Bilim-ınnovatsııa» lıtseıiniń 4 túleginiń SAT halyqaralyq sertıfıkatynyń nátıjesi UBT-nyń 140 balyna teńestirildi. Shekti ball jınaı almaǵan túlekter 15-17 tamyz kúnderi ulttyq biryńǵaı testileýge qatysa alady. Testileýge ótinishter 1 tamyzǵa deıin júrgiziledi. Bul jaǵdaıda talapker joǵary oqý ornynyń aqyly bólimine túse alady. Ýnıversıtettiń aqyly bólimine túsý úshin qańtar aıyndaǵy shekti ball jınaǵan sertıfıkattary jaramdy bolyp esepteledi» dedi A.Seıdalıev.

Aıta keteıik, maýsym aıynda UBT-dan shekti ball jınaǵan túlekter joǵary oqý ornynda oqý úshin memlekettik grant konkýrsyna qatysady. Bıyl memlekettik grant kólemi 69 myń 256 orynǵa bekitildi.

Qujat qabyldaý egov.kz elektrondy úkimet portaly arqyly 13-30 shilde kúnderi ótedi. Konkýrs nátıjesi jarııalanǵannan keıin 5-10 tamyzda jergilikti ákimdiktiń grantyna ótinish qabyldaý bastalady.

Jergilikti ákimdiktiń granty konkýrsyna úmitkerlerge arnalǵan jadynama aqparat memlekettik grant konkýrsy ótkennen keıin Mańǵystaý oblystyq bilim basqarmasynyń áleýmettik jelilerdegi resmı paraqshasynda jáne ınternet-resýrsynda jarııalanady.