Mańǵystaýda 3 myń tonnadan astam munaı zańsyz óndirilgen

AQTAÝ. QazAqparat - Mańǵystaý oblysynda quny 500 mln teńgeden asatyn 3 myń tonnadan astam munaı zańsyz óndirilgen, dep habarlaıdy QazAqparat Qarjy monıtorıngi komıtetiniń baspasóz qyzmetine silteme jasap.

Komıtettiń Mańǵystaý oblysy boıynsha Ekonomıkalyq tergeý departamenti qyzmetkerleri munaıdyń jáne munaı ónimderiniń shyǵarylý zańdylyǵyn rastaıtyn qujatsyz olardy tasymaldaý, ıemdený, ótkizý, saqtaý, sondaı-aq munaıdy qaıta óńdeýge qatysty qylmystyq isti tergeýdi aıaqtady.

«Tergeý barysynda «SK Petroleum» JShS-nyń 2019 jylǵy tamyzdan bastap «Soltústik Qaramandybas» munaı ken ornynan Jańaózen qalasyndaǵy munaı quıatyn bazalarǵa jalpy kólemi 3441,408 tonna shıki munaı tıegeni anyqtaldy. Zańsyz óndirilgen 3367,056 metrıkalyq tonna kólemindegi shıki munaıdyń ortasha naryqtaǵy quny sarapshylardyń saraptama qorytyndysy boıynsha 581 724 571 teńge turady», delingen habarlamada.

Atalmysh munaıǵa sottyń sanqtsııasy boıynsha tyıym salyndy.

«Sotqa deıingi tergeý aıasynda «SK Petroleum» JShS dırektorynyń kinási tolyqtaı dáleldendi. Aıyptalýshy tulǵalardyń áreketi Qylmystyq kodekstiń 197-baby 4-bólimi 2 tarmaǵy jáne 214-baptyń 2-bólimi 2 tarmaǵyna sáıkes keledi. 20 sáýirde qylmystyq is aıyptaý aktisimen birge sottyń qaraýyna jiberildi», delingen habarlamada.