Mańǵystaýda 25 myńnan astam otbasy ataýly áleýmettik kómek alady
Óńirlik kommýnıkatsııalar qyzmetinde ótken brıfıngte sala mamandary bıyldan bastap engizilgen memlekettik áleýmettik kómektiń úsh túrin aıtyp berdi. Olar:
- tórt jáne odan da kóp kámeletke tolmaǵan balalary bar otbasylar úshin memlekettik járdemaqy;
- jańa formattaǵy ataýly áleýmettik kómek (AÁK);
- jáne az qamtylǵan otbasy (1-18 jas aralyǵyndaǵy) balalary úshin kepildendirilgen áleýmettik kómek dep belgilengen.
«Mańǵystaý oblysy boıynsha 2020 jyly 25 myńnan astam kópbalaly otbasyǵa jańa taǵaıyndalǵan járdemaqy alatyn bolady. Ol úshin respýblıka jáne jergilikti bıýdjetten 3,9 mlrd teńge bólingen. Búginde memleket qoldaýyna 24 myń 445 januıa ıe bolyp otyr. Aıta keteıik, ataýly áleýmettik kómektiń jańa formaty jan basyna shaqqandaǵy ortasha aılyq tabysy kedeıshilik sheginen tómen otbasylarǵa tólenetin memlekettik qoldaý tetigi bolyp tabylady. Bul rette, memleketimizde kedeıshilik shegi kúnkóris deńgeıiniń 70 protsent deńgeıinde belgilenedi. Osy jyldyń 1 qańtarynda Mańǵystaý oblysy boıynsha kúnkóris deńgeıi 36 myń 560 teńge dep kórsetilgen. Sáıkesinshe, kedeıshilik shegi - 25 myń 592 teńgeni quraıdy», - dedi oblys ákiminiń birinshi orynbasary Álıhan Qyraýbaev.
Mysal retinde aıtsaq, kámeletke tolmaǵan úsh balasy bar, jan basyna shaqqandaǵy ortasha aılyq tabysy 10 myń teńgeni quraıtyn otbasynyń ár múshesine aıyna 15 myń 592 teńge áleýmettik kómek tıisti. Eger otbasynda bes adam bolǵan jaǵdaıda aıyna 78 myń teńgege jýyq ataýly áleýmettik kómek (AÁK) taǵaıyndalady. Budan basqa kámelet jasqa tolmaǵan úsh balaǵa kepildendirilgen áleýmettik toptama beriledi.
«Mańyzdy bir másele: AÁK jumyspen qamtý sharalaryna qatysqan jaǵdaıda ǵana tólenedi. Eger otbasynyń eńbekke qabiletti múshesi jumyspen qamtý sharalarynan bas tartqan jaǵdaıda otbasynyń barlyǵyna ataýly áleýmettik kómek tóleý toqtatylady» - dedi Mańǵystaý oblysy ákiminiń birinshi orynbasary Álıhan Qyraýbaev.