Mańǵystaýda 245 kásiporyn Ashyq jobasyna qosyldy

AQTAÝ. QazAqparat - Mańǵystaý oblysynda 245 kásiporyn Ashyq jobasy aıasynda jumys istep jatyr. Onyń ishinde 199 nysan - resmı, al 46 - test rejıminde ashylǵan, dep habarlaıdy QazAqparat tilshisi.

Bul týraly Qoǵamdyq kommýnıkatsııa ortalyǵynda ótken brıfıngte Mańǵystaý oblysy kásipkerlik jáne saýda basqarmasynyń basshysy Janna Toqbaeva málim etti.

«Bizdiń basty mindetimiz kásipkerlerdi qoldaý. Qazirgi ýaqytta pılottyq jobaǵa birneshe kásipkerlik sýbektileri engizildi. Onyń ishinde 199 kásipkerlik nysan testtik rejımnen ótti. Bul kásipkerlerdiń tizimi oblys ákimdiginiń resmı saıtynda bar. Sondaı-aq bul tizim qala, aýdan ákimdikteriniń resmı paraqshalaryna ornalastyryldy», - dedi Janna Toqbaeva.

Baspasóz konferentsııasyna Mańǵystaý oblysy Kásipkerler palatasy dırektorynyń orynbasary Aqqý Aıtjan qatysty.

Onyń aıtýynsha, óńirde osy kúnge deıin Ashyq qosymshasy arqyly QR-kodty 34 485 adam skanerden ótkizgen.

Onyń ishinde 26341 kelýshi qoǵamdyq tamaqtaný ortalyqtarynda tirkeldi.

«Jańa joba óńirde qoǵamdyq tamaqtaný obektileri, boýlıng, qonaq úıler, kınoteatrlar, kompıýterlik klýbtar, saýnalar, SPA-ortalyqtar, teatrlar, fıtnes-ortalyqtar men týragenttikter boıynsha 10 salada jumys isteıdi», - dedi Aqqý Aıtjanova.