Mańǵystaýda 2 jel elektr stansasy salynyp jatyr

AQTAÝ. QazAqparat - Túpqaraǵanda qýaty 42 mVt bolatyn jel elektr stantsııasynyń qurylysy júrip jatyr. Oblys ákimi aýdanǵa is-sapary aıasynda jumys qarqynyn kórip, qurylys barysymen tanysty, dep xabarlaıdy QazAqparat tilshisi.

Aýdanda bıiktigi 95 metr bolatyn 17 jel dıirmeni salynady. Árqaısysynyń qýaty - saǵatyna 160 mln kVt. Bul oblysty elektr qýatymen tolyq qamtamasyz etýge jetkilikti. Jel elektr stansasy balamaly energııa kózderin óndirýde teńdesi joq joba bolmaq. 

«Joba quny - 47 mln AQSh dollary. Respýblıkalyq bıýdjetten bir tıyn da almadyq. Barlyǵyn túgel ınvestorlar júzege asyrady. Biz osyǵan deıin Qytaıdyń birqatar aımaqtarynda iri jel elektr stansalaryn saldyq. Tájirıbemiz mol»,-deıdi merdiger kompanııa ókili. 

Stansa kelesi jyldyń maýsym aıynda paıdalanýǵa beriledi dep josparlanǵan. Qurylysqa jergilikti jerden 100 shaqty adam tartylmaq. Oblys ákimi tıisti jumystardyń ýaqytyly aıaqtalýyn qadaǵalaıtynyn aıtty.

Sondaı-aq, osy aýdanda taǵy bir jel elektr stansasy turǵyzylýda. Qazir qurylystyń 50 paıyzy aıaqtalǵan. 24 jel dıirmeni 43,6 MVt energııa óndiredi. Injenerler aımaq basshysyna qurylys maýsym aıynda tolyq bitetinin aıtty. Joba quny - 4 mlrd teńge. Bul nysan da ınvestorlar qarajaty esebinen salynyp jatyr.