Mańǵystaýda 171 jer telimi memleket menshigine qaıtaryldy

AQTAÝ. QazAqparat - Mańǵystaý oblysy ákiminiń orynbasary Rýslan Sákeev jer qatynastary máselesine qatysty jıyn ótkizdi, dep habarlaıdy QazAqparat.

Oblys ákimi Eraly Toǵjanovtyń tapsyrmasyna sáıkes ótkizilgen jıynda óńirdegi jer máselesine qatysty málimetter jarııa etildi. Oblys kóleminde 2017-2018 jyldary ıgerilmegen jáne paıdalaný merzimi ótip ketken 26 413,87 gektar 452 jer telimi anyqtalǵan. Jalpy kólemi 20 733,2 ga bolatyn barlyǵy 171 jer telimi memleket menshigine qaıtaryldy.

Jerdiń maqsattyq nysanyn aýystyryp, basynda belgilengen jospardan  basqa nysan salý da kóbeıip ketken. Ásirese Túpqaraǵan men Munaıly aýdandarynda osyndaı zańbuzýshylyq jıi kezdesedi. Sonymen qatar, Beıneý aýdanynda zańsyz berilgen jer telimi memleket menshigine qaıtaryldy. Joǵaryda atalǵan zań buzýshylyqtarǵa jol bergen jer salasyna jaýapty aýdan ákimderiniń orynbasarlaryna jer, sáýlet jáne qala qurylysy bólimderiniń basshylaryn tártiptik jaýapkershilikke tartý jóninde tapsyrma berildi. Al Jańaózen qalasynda 18 jer telimi boıynsha sot protsesi júrip jatyr.

Búginde oblys boıynsha jeke turǵyn úı qurylysyn salý  úshin jer telimin alýǵa kezekte 166 312 adam turǵan.

Qazirgi kezde barlyq eldi mekenderdiń bas josparlary jasaqtalǵan.

Olardyń ishinde Aqtaý men Jańaózen qalalarynda jeke turǵyn úı qurylysy úshin alańdar qaralmaǵan,  basqa aýdandar boıynsha bas josparynda 26 820 ýchaske qaralǵan.

Jer qatynastary salasynyń máseleleri -  qashanda oblys ákiminiń qadaǵalaýyndaǵy ózekti baǵyttardyń biri. Jerge qatysty, jerdiń paıdalanylýyna, buzylýyna, ıgerilmegen jerlerdi memleket menshigine qaıtarýǵa baılanysty ákimdikte birneshe jınalys ótkizilip, oqý-ádistemelik kitapshalar taratylyp, naqty tapsyrmalary berilgen bolatyn.