Mańǵystaýda 149 adam úıden ekpe aldy

AQTAÝ. QazAqparat - Mańǵystaýda 149 adam koronavırýs vaktsınasy úıden aparyp salyndy, dep habarlaıdy QazAqparat tilshisi. Bul týraly Mańǵystaý oblysy densaýlyq saqtaý basqarmasynyń basshysy Amanbek Jumyrov málim etti.

Qazir aýla aralaý jumystary boıynsha oblystaǵy 17 kóshpeli brıgada 149 adamǵa ekpeni úıden saldy.

«Qazir mobıldi toptar úıden 1 057 qyzmet kórsetti. Úı jaǵdaıynda pnevmonııaǵa qarsy em qabyldap jatqandar sany - 135, jiti respıratorlyq vırýstyq ınfektsııaǵa qarsy 421 adam emdelýde. Jedel-járdem bóliminde 53 brıgada jumys istep jatyr. Buǵan deıin táýligine myńnan astam shaqyrtý tirkelse, qazir qońyraý sany 749-ǵa deıin tómendedi. Búginde vırýs pnevmonııasy boıynsha túsetin shaqyrtý deńgeıi tómendedi», - dedi Amanbek Jumyrov.

Spıkerdiń aıtýynsha, oblysta koroanvırýs vaktsınasynyń I-komponentimen 134 115, II-komponentpen 95 811 adam egildi. Qazir qoldanysta reseılik «Sputnik V», QazVac, Vero Cell jáne CoronaVac vaktsınalary bar.

Al Mańǵystaý oblysy sanıtarııalyq-epıdemıologııalyq baqylaý departamentiniń basshysy Ǵazız Nadýevtyń málimetinshe, óńirdegi sońǵy reprodýktıvti kórsetkish 1,2. Tósek korynyń kórsetkishi 48%.

«Jansaqtaý bólimshesinde 121 naýqas jatyr. Onyń ishinde aýyr jaǵdaıda 58, óte aýyr halde 68. Sońǵy táýlikte 16 adam qaıtys boldy. Oblys aımaǵynda koronavırýs ınfektsııasyna qarsy vaktsınatsııa júrgizý jumystary jalǵasyp jatyr. Búgingi tańda 52 ekpe egý pýnkti bar. Onyń ishinde 38-i medıtsınalyq uıymdardarda ornalasqan, al 14-i jyljymaly egý pýnkti. Degenmen oblys boıynsha vaktsına alý kórsetkishi tómen. Osy oraıda barsha turǵyndardy ekpe alýǵa shaqyramyn»,- dedi Ǵazız Nadýev.