Mańǵystaýda 111 jer ýchaskesi memleket menshigine qaıtaryldy

AQTAÝ. QazAqparat - Memleket basshysy Nursultan Nazarbaev bes ınstıtýtsıonaldyq reformany júzege asyrý jónindegi 100 naqty qadam joldaýynda(35-36qadam) paıdalanylmaı jatqan jerdi memleket menshigine qaıtarýdy tapsyrǵan bolatyn. Elbasy tapsyrmasyna sáıkes, Mańǵystaý oblysynyń ákimdigi júıeli túrde jumys júrgizýde, dep habarlaıdy óńir basshysynyń baspasóz qyzmeti. 

Kezekti jıyn barysynda oblys ákimi Eraly Toǵjanov: «Kezinde keı jerler jekemenshikke ótip ketkeni belgili. Olardy memlekettiń menshigine qaıtarýymyz kerek. Onyń ishinde Aqtaý qalasyndaǵy teńiz jaǵalaýy da bar. Jaǵalaýda jasalyp jatqan jumystyń barlyǵy tek qana halyq úshin bolýy kerek», - degen bolatyn. 

Mańǵystaý oblysynda 2017 jyldyń 1 qańtarynan bastap búgingi kúnge deıin aýdandyq jáne qalalyq ákimdikterdiń málimetteri negizinde, jer ýchaskesiniń paıdalaný merziminiń  ótýine baılanysty qaıtarylǵan jáne paıdalanylmaǵan  452 jer telimi anyqtalyp, onyń jalpy kólemi 26413,87 gektardy qurady.

Sonymen birge, kórsetilgen merzimde kólemi 20700,919 ga quraıtyn 111 jer ýchaskesi memleket menshigine qaıtarylǵan. 

Búgingi tańda ıgerilmegen jerdi memleket menshigine qaıtarý jumystary qarqyndy júrip jatyr jáne bul oblys ákimi Eraly Toǵjanovtyń jiti baqylaýynda.