Mańǵystaý turǵyndaryn tuşy sýmen qamtý úshin qandaı jobalar júzege asyrylady

NUR-SULTAN. QazAqparat – «Kaspıı» sý tuşytý zaýytynyń qýatyn táýligine 40 myń tekshe metrge deıin keńeıtý jobasy júzege asyrylýda. Bul týraly QR Indýstrııa jáne ınfraqurylymdyq damý birinshi vıtse-mınıstri Qaıyrbek Óskenbaev aıtty, dep habarlaıdy QazAqparat tilshisi.

«Búginde mınıstrlik ákimdikpen birlesip, bıýdjettik baǵdarlamalar aıasynda Aqtaý qalasyndaǵy «Kaspıı» sý tuşytý zaýytynyń qýatyn táýligine 40 myń tekshe metrge deıin keńeıtý jobasyn júzege asyryp jatyr. Buǵan qosa, jeke ınvestorlar esebinen «Qarajanbas» ken ornynda qýaty 17 myń tekshe metr bolatyn sý tuşytý zaýytynyń qurylysyn aıaqtaý josparlanǵan», - dedi ol Májilistegi dóńgelek ústel barysynda.

Onyń atap ótýinshe, atalǵan jobalardy júzege asyrýdyń nátıjesinde «Astrahan-Mańǵyshlaq» sý qubyrymen qamtamasyz etilip otyrǵan Qaraqııa, Beıneý, Mańǵystaý aýdandary jáne Jańaózen qalasy turǵyndarynyń bir bóligi aýyz sýmen qosymsha qamtylatyn bolady.