Mańǵystaý sharýalarynyń sý jetkizý shyǵynyna sýbısıdııa tólenedi

NUR-SULTAN. QazAqparat –Mańǵystaý oblysyn damytýdyń besjyldyq jospary aıasynda sharýalardyń sý jetkizý shyǵyndaryn sýbsıdııalaý sharalary engizildi. Bul týraly QR Aýyl sharýashylyǵy mınıstri Erbol Qarashókeev Úkimet otyrysynda málim etti, dep habarlaıdy QazAqparat tilshisi.

«Ózderińiz biletindeı, bıylǵy jyl óńir úshin óte qıyn boldy, aýa raıynyń óte ystyq bolýy, sondaı-aq kóktemde jáne jazda jaýyn-shashynnyń bolmaýy azyq jaǵdaıyna qatty áser etti jáne oblystyń osy baǵyttaǵy mańyzdy problemalaryn kóbeıtti. Bul faktorlardyń barlyǵy keshendi josparda eskerildi, nátıjesinde «Agroónerkásiptik keshen» bólimine 8 is-shara engizildi», - dedi mınıstr.

Aıtýynsha ol jobalar myna baǵyttardy qamtyǵan:

- aýyl sharýashylyǵy janýarlary úshin azyqtyń turaqtandyrý qorlaryn qalyptastyrý, jerasty sýlaryna jete barlaý júrgizý, «Beıneý astyq termınalynyń» múlkin satyp alý máselesin pysyqtaý;

- asyl tuqymdy túıe sharýashylyǵyn damytý, ınvestıtsııalyq sýbsıdııalaý jáne aýyl sharýashylyǵy taýaryn óndirýshiler úshin sý jetkizý qyzmetteriniń qunyn sýbsıdııalaý;

- jylyjaı salý, balyq ósirý, qurama jem, qus etin óndirý boıynsha 147,3 mlrd teńgeniń 25 ınvestıtsııalyq jobasyn iske asyrý.

«Bıyl 8,8 mlrd teńge somasyna 12 ınvestıtsııalyq jobany iske asyrý kózdelgen. Onyń ishinde 7,2 mlrd teńge somasyna 6 joba paıdalanýǵa berildi. Qalǵan 6 joba aıaqtalý satysynda, olardy tórtinshi toqsanda paıdalanýǵa berý josparlanyp otyr», - dedi Erbol Qarashókeev.