Mańǵystaý óńirinde ulttyq kıim sánge aınaldy
Aq jaýlyqty analar men qyz-kelinshekter kúndelikti ómirde de, toı-jıyndarda, Naýryz merekesinde qazaqy oıýlarmen zerdelengen kıimderdi kıip júredi. Qamzol men beshpettiń kúndelikti turmysqa enýine jergilikti qolóner sheberleriniń de qosqan úlesi kóp. Máselen, Aqtaýdaǵy «Órnek» sán úıinde 30 jyldan beri ulttyq kıimniń túr-túri tigiledi. Ulttyq kıim - ultymyzdyń aınasy. Aqtaýlyq Gúlstan Beısenova úshin qamzol, beshpet kóneniń kózi ǵana emes, naǵyz sánniń ózi. Toılarda da, kúndelikti ómirde de ulttyq kıimdi tastamaı kıip júredi. Búgin Naýryz merekesine oraı «Órnek» sán úıinen qazaqy oıý-órnekpen kómkerilgen qamzol satyp alýǵa keldi.
«Kóp adamdar qyzyǵa qaraıdy. Sebebi qazaqtyń oıý-órnekteri óte erekshe. Nasıhattap kórsetip, ózimizdiń qazaqtyń qandaı halyq ekenin, qandaı ásem órnekteri bar ekenin toı-jıyndarda kórsetip, kıgendi unatamyn», - deıdi Aqtaý qalasynyń turǵyny Gúlstan Beısenova.
Úkili kámshat, búrmeli kóılek. Órnekpen órilip, tastarmen árlengen bul kóılek - uzatylar qyzdyń kıimi. Kózdiń jaýyn alar týyndy eki aptada tigilipti. Úkisi úlbiregen Nesibeli uzatý toıyna ulttyq kıim kımekshi.
«Bul - ulttyq naqyshta biraq zamanaýı úlgide tigilgen kóılek. Basymdaǵy bas kıim buryndary «shekelik» dep atalǵan. Ony qyzdar kóbine qısaıtyp qoıyp kıetin bolǵan. Men biraq oǵan da azdap ózgeris engizdim. Budan bólek birneshe ulttyq kóılekke tapsyrys berdim», - deıdi Aqtaý qalasynyń turǵyny Nesibeli Esenǵalıeva.
On saýsaǵynan óneri tamǵan Nurııash Nııazova jeti jasynan-aq ıne men jipti janyna serik etipti. Esesine, qolóneri ómirlik azyǵyna aınaldy. Osydan 30 jyl buryn Mańǵystaýda tuńǵysh ret ulttyq kıim tigýdi qolǵa aldy. «Órnek» sán úıiniń negizin qalap, júzdegen qyzdy qolónerge baýlydy. Qajyrly eńbegi óz jemisin berdi. Búginde búkil Mańǵystaý jurtshylyǵy Nurııash ájeniń shákirtteri tikken ulttyq kıimderdi kıip júr.