Mańǵystaý óńirinde ken oryndaryn izdeýge ınvestıtsııa tartý qajet
Aqordanyń baspasóz qyzmeti taratqan málimetke sáıkes, QR Prezıdenti keńes barysynda munaı-gaz salasyn odan ári damytý, sonyń ishinde óńirdegi jańa ken oryndaryn ıgerý máselesin kóterdi. Osy rette, Memleket basshysy jalpy quny shamamen 5 mıllıard dollar bolatyn «Qalamqas teńiz» jáne «Hazar» iri ken oryndaryn ıgerý jumystaryn bastaý jónindegi sheshimin eske saldy. Prezıdent ken oryndaryn ıgerý jumystaryna jergilikti kompanııalar men kadrlardy barynsha tartýdyń mańyzdy ekenin atap ótti.
Budan bólek Qasym-Jomart Toqaev munaı ken oryndarynyń birte-birte tozýyna, 2030 jylǵa qaraı óndiriletin munaıdyń azaıýyna baılanysty problemany da qozǵady. Atalǵan máseleni sheshý úshin Prezıdent geologııalyq barlaý jáne jańa ken oryndaryn izdeý baǵytyna belsendi túrde ınvestıtsııa tartýǵa shaqyrdy. Bul jumystardy atqarý barysynda jyl sońyna deıin qurylatyn Ulttyq geologııalyq qyzmet mańyzdy ról atqarýy tıis.