Mańǵystaý oblysynyń Munaıly aýdanynda ınfraqurylym jańǵyrtylýda (FOTO)

AQTAÝ. QazAqparat -Mańǵystaýdyń halyq tyǵyz ornalasqan jańa aýdany Munaılyda, Atameken aýylynda, Mańǵystaý jáne Batyr turǵyn úı alaptarynda biryńǵaı ortalyq sý qubyrymen jalǵaıtyn syrtqy ınjenerlik kommýnıkatsııalar júrgizý jumystary bastaldy.

«Sońǵy eki jylda «Kaspıı» tuşylandyrý zaýyty Munaıly aýdanyna táýligine 7-8 myń tekshe metr sý berip otyr. Aýdan halqy kúnnen-kúnge kóbeıgendikten, bul kólem jetpeıdi. Sondyqtan «Aqbulaq» baǵdarlamasy aıasynda aýyl turǵyndaryn ortalyq sýmen qamtamsyz etý jobasy ázirlendi.  Atameken, Mańystaý, Batyr aýyldarynda jumys bastalyp ketti. Basqudyq pen Qyzyltóbe aýyldary kezekte tur. Eldi mekenderge sý taratatyn qosymsha sý qoımasy men sorǵy salyp, sý alý sorǵy stansasynyń qýatyn arttyrý josparlanyp otyr. Qazir bizde tuşylandyrý zaýytynan túsetin sýdy jınap, saqtaý úshin 2 400 jáne 4 800 tekshelik eki sý qoımasy bar, sol jaqtan sý tasýshylar aýyldarǵa sý taratady», - dep habarlady Munaıly aýdany ákiminiń orynbasary Nurlybek Jolbaev.

Sondaı-aq, N.Jolbaevtyń aıtýynsha, gazben jáne sýmen jabdyqtaýdyń magıstraldy jeliler qurylysy satylaı júrgizilip keledi, elektrojeliler salynýda, Munaıly aýdanyndaǵy Mańǵystaý aýylyndaǵy temir jol vokzaly men onyń avtoturaq aýmaǵyn kógaldandyrý, keńeıtý jumystary júrgizilýde.

Jolaýshylar aǵyny ósip keledi, vokzal aldyndaǵy aýmaqty keńeıtý qajettiligi týdy. Ótken jyly vokzal aldyndaǵy aýmaqty qaıta jańartý úshin jobalyq-smetalyq qujattama ázirlendi. Oǵan bıyl jergilikti bıýdjetten 71 mıllıon teńge bólingen. Qurylys jumystary bastalyp ketti.