Mańǵystaý oblysynyń ákimi Bıbisara Asaýbaevany Álem chempıonatyndaǵy jeńisimen quttyqtady

AQTAÝ. QazAqparat - Búgin Mańǵystaý oblysynyń ákimi Nurlan Noǵaev shahmattan ótken Álem chempıonatynda jeńimpaz atanǵan Bıbisara Asaýbaeva men onyń anasy ári bapkeri Lıana Tańjaryqovany qabyldady, dep habarlaıdy QazAqparat.

Oblys ákiminiń baspasóz qyzmetinen málim etkendeı, óńir basshysy Mańǵystaý oblysynyń atynan óner kórsetip júrgen 17 jastaǵy Bıbisarana aıtýly jeńisimen quttyqtap, sáttilik tiledi.

«Bıbisara Asaýbaevany eresekter arasynda blıts boıynsha ótken Álem chempıonatyndaǵy jarqyn jeńisimen quttyqtaımyn! Siz halyqaralyq básekede joǵarǵy sporttyq sheberlik tanytyp, elimizdiń jáne Mańǵystaý óńiriniń mereıin ústem ettińiz. Sizdiń shahmat boıynsha eń jas chempıon atanýyńyz otandyq sport úshin tarıhı oqıǵa dep esepteımin. Áli de alar asýlaryńyz kóp bolyp, tabystan tabysqa jete berýińizge tilektestik bildiremin», - dedi Nurlan Noǵaev.

Eske salaıyq, Bıbisara Asaýbaeva Varshavada ótken Álem chempıonatynda eresekter arasyndaǵy shahmattan Qazaqstan tarıhyndaǵy alǵashqy altyn júldeni ıelendi. Osylaısha, Bıbisara shahmat tarıhyndaǵy eń jas álem chempıony bolyp otyr.

Buǵan deıin Bıbisara balalar men jasóspirimder sanattarynda 5 dúrkin álem chempıony jáne eki dúrkin álem vıtse-chempıony atanǵan edi. Shahmat tarıhyndaǵy eń jas Fide Master ataǵynyń ıegeri. 2017 jyly «Álem quramasy» sapynda «Ǵasyr matchy» halyqaralyq týrnıriniń jeńimpazy boldy. 2019 jyly Ýkraınada «Altyn Monǵoz» Halyqaralyq jyl syılyǵynyń nomınanty jáne ıegeri atandy.

Sondaı-aq ol mańǵystaýlyq sportshylarǵa turaqty túrde sheberlik sabaqtaryn ótkizip, óńir shahmatshylarynyń qataryn kóbeıtýge atsalysyp keledi.