Mańǵystaý oblysynyń ákimi «Araks» kemesindegi zııandy zattardy jaqyn arada joıýdy tapsyrdy

AQTAÝ. QazAqparat - Aqtaýda Kaspıı teńizindegi RF «Araks» kemesine qatysty ekologııalyq tótenshe jaǵdaı oryn alýyna jol bermeý jónindegi komıssııanyń kezekten tys otyrysy ótti, dep habarlaıdy «QazAqparat» HAA tilshisi oblys ákiminiń baspasóz qyzmetine silteme jasap.

14 maýsymda  oblys ákimdiginde óńir basshysy Eraly Toǵjanovtyń buıryǵymen RF «Araks» kemesine qatysty Kaspıı teńizinde tótenshe jaǵdaılardyń aldyn alý komıssııasynyń kezekten tys otyrysy ótti.

Aıta keteıik, 2016 jyldyń 4 maýsymynda  Qaraqııa aýdanynyń qumdy múıisinde shamamen jaǵadan 100 metr qashyqtyqta «Araks» kemesi turyp qalǵan bolatyn. Kórsetilgen málimetter boıynsha, kemede 17 qap jáne 11 dana eki júz lıtrlik mazýttalǵan bóshke, sondaı-aq, 130 tonna  lastanǵan sý (munaı ónimderi) men 500 tonna ballast tabylǵan.

Mańǵystaý oblystyq ekologııa Departamentiniń basshysy Abaı Safınniń aıtýynsha, aǵymdaǵy jyldyń 9 maýsymynda tanker men teńiz aýasynyń jáne tanker mańyndaǵy teńiz sýynyń tazalyǵyn tekserý jumystary júrgizilgen.

Nátıjesinde las qaldyqtardyń shekti uıǵaryndy kontsentratsııasy mólsherinen aspaǵandyǵy anyqtaldy. Al tankerdegi aýany tekserý barysynda ondaǵy metan kóleminiń 51,4%-ǵa joǵary ekeni belgili boldy (odan bólek kúıik ıisi de baıqalǵan). Jabyq tankerdegi metan mólsheriniń kóptigi jarylys qaýpin týdyrýy yqtımal (jarylysqa ashyq ot, onyń ushqyny, joǵary temperatýra áser etýi múmkin).

-«Trans Kaspıı» kompanııasynyń qojaıynyna kemeni ornynan alyp tastaý jóninde birneshe ret aıtyldy. Sondaı-aq, «Araks» kemesindegi zııandy ónimderdi qysqa merzim ishinde joıý jóninde de usynystar tastaldy. Degenmen keme ıesi tarapynan búginge deıin naqty sheshim aıtylmaı keledi. Sondyqtan «Rosmortransport» Memlekettik Basqarmasynyń kómegine júginýge týra keldi.  Qazirgi tańda «Trans Kaspıı» qojaıyny zańdyq tulǵa bolyp tanylmaıdy. Mahachkalanyń kemeler tiziminde bul keme «Trans Kaspıı» ıeliginde dep kórsetilgen. QR ınvestıtsııalar jáne damý mınıstrliginiń jol-kólik oqıǵalaryn zertteý departamenti men RF zertteý organdary birlesýimen «Araks» kemesine tekserý jumystary júrgizildi, - deıdi Aqtaý jáne Baýtıno teńiz porty ákimshiliginiń jetekshisi Nurbol Ermanov.

Oblys basshysy Eraly Toǵjanov jaýapty tulǵalardyń málimdemesin tyńdaǵan soń, qysqa merzim ishinde «Araks» kemesin las qaldyqtardan  tazartýdy tapsyrdy. Oǵan Aqtaý jáne Baýtıno teńiz porty ákimshiliginiń basshysy Nurbol Ermanovty jetekshi etip taǵaıyndady.

Oblys orynbasary Sh. Ilmýhanbetovaǵa usynylǵan esep boıynsha oblystyq bıýdjetten qarjy bólýdi tapsyryp, QR UQK ShQ «Jaǵalaýlyq kúzet» basqarmasyn qajetti tehnıkamen qamtamasyz etýge mindettedi. Al Mańǵystaý oblystyq Іshki ister departamenti kemeni tazartý jumystary aıaqtalǵansha kúzet qyzmeti ókilderiniń qatysýyn, bógde adamdardyń aralaspaýyn nazarda ustaıtyn bolady.