Mańǵystaý oblysyndaǵy aýyl mektebin eki-aq túlek bitirdi

AQTAÝ. QazAqparat – Mańǵystaý oblysynyń Beıneý aýdanyna qarasty Sarǵa aýylyndaǵy Beıneý mektep-ınternatyn eki-aq túlek bitirdi. Óıtkeni mektepte oqýshy sany az, dep habarlaıdy QazAqparat tilshisi.

Bıyl Mańǵystaý oblysynda 7439 oqýshy mektep bitirdi. Oblys boıynsha eń kóp mektep túlegi Munaıly aýdanynda tirkelgen. Atameken aýylyndaǵy №7 mektepti 117 túlek bitirdi. Muǵalimderdiń aıtýynsha, munda alty 11-synyp bolǵan.

Al Beıneý aýdanyndaǵy Sarǵa aýylynda 11-synypty tek eki qyz bala aıaqtady.

«Bıyl Sarǵa aýylyndaǵy Beıneý mektep-ınternatynan 2 túlek bitirdi. Byltyr osy synypta kórshi aýyldan eki er bala kelip oqyǵan edi. Alaıda 11-synypqa kóshetin ýaqytta olar ketip qaldy. Sebebi dene tárbıesi sekildi sabaqtar er balalar úshin qyzyqsyz boldy. Beıneý mektep-ınternatynda 104 oqýshy bar. Onyń 50-i ınternatta jatady. Oqýshylarǵa 29 muǵalim sabaq beredi. Bizde 11-synypqa deıin oqýshylar iriktelip, tek ekeýi ǵana qaldy. Kóbi 9-synyptan keıin kolledjge tústi. Bıylǵy túlekter alda ózderi qalaǵan oqý ornyna túsemiz dep otyr», - deıdi mektep dırektory Aısa Saǵyndyqov.