Mańǵystaý oblysynda jol apatynan 4 adam qaza tapty

AQTAÝ. QazAqparat - Mańǵystaý oblysynda jol apatynan tórt adam qaza tapty, dep habarlaıdy QazAqparat tilshisi.

Jol-kólik oqıǵasy 28 shildede «Aqtaý-Beıneý» r espýblıkalyq mańyzy bar tasjolynyń 325-shi shaqyrymynda boldy.

«Lada Priora avtokóliginiń júrgizýshisi rýlge ıe bola almaı qalyp, qarsy jolaqqa shyǵyp ketken. Onda Mercedes Benz S-320 avtokóligimen soqtyǵysqan.

Saldarynan eki kóliktiń de júrgizýshi, Lada Priora avtokóliginde bolǵan eki jolaýshy oqıǵa ornynda kóz jumdy. Taǵy eki jolaýshy zardap shekti. Olar jaqyn mańdaǵy aýdandyq aýrýhanaǵa jatqyzyldy», - dedi Mańǵystaý oblystyq Polıtsııa departamentiniń baspasóz qyzmetinen.

Atalǵan fakti QR Qylmystyq kodeksiniń 345-baby 4-bóligi boıynsha Mańǵystaý aýdanynyń polıtsııa bólimshesinde sotqa deıingi tergep-tekserýdiń biryńǵaı tizilimine tirkeldi. Tergeý júrgizilip jatyr.