Mańǵystaý oblysynda jastardy qoldaýǵa 762 mln teńge bólindi

AQTAÝ. QazAqparat - Bıyl Mańǵystaý oblysynda memlekettik jastar saıasatyn iske asyrýǵa 762 mln teńge bólindi, dep habarlaıdy QazAqparat tilshisi.

Óńirde 14-35 jas aralyǵyndaǵy jastar sany – 232 994.

«Jastar saıasatyn júzege asyrý maqsatynda 3 basym baǵyt belgilenip otyr. Alǵashqy baǵyt boıynsha jastardyń máselelerine qatysty jobalar men baǵdarlamalar júzege asyrylady. Ekinshi baǵyt jastar resýrstyq ortalyqtarynyń qyzmetin júıelendirilse, úshinshi baǵyt boıynsha jastar uıymdaryna kómek kórsetiledi», - dedi Mańǵystaý oblysy jastar resýrstyq ortalyǵynyń basshysy Muqash Oralbaı.

Aımaqta 5 aýdandyq, 1 qalalyq, 1 oblystyq jastar resýrstyq ortalyǵy bar. Alaıda, ol ortalyqtar jastarǵa arnalǵan zamanaýı ǵımaratpen qamtamasyz etilmegen.

Bıyl oblysta jastar kásipkerligin qoldaýǵa baǵyttalǵan granttyq qarjylandyrý kólemi 25 mıllıonnan 250 mıllıon teńgege artyp, 163 jas 2,5%-ben 5 mıllıon teńgege deıin shaǵyn nesıe ala alady.

Sonymen qatar, óńirde alǵash ret «Mańǵystaý jastary» turǵyn úı baǵdarlamasy jáne jastardyń áleýmettik bastamalaryna qoldaý kórsetýge baǵyttalǵan «Táýelsizdik urpaqtary» granttyq jobasy júzege asyrylmaq.

Sondaı-aq grant qarjysy esebinen óńirdegi úkimettik emes uıymdar jastarǵa arnalǵan 11 áleýmettik jobany júzege asyrady.