Mańǵystaý oblysynda jalǵan dıplommen sabaq bergen muǵalimder anyqtaldy

ASTANA. QazAqparat - Mańǵystaý oblysynyń kolledjderinde jalǵan dıplommen sabaq bergen qyzmetkerler anyqtaldy, dep habarlaıdy QR Bas prokýratýrasy.

Taldaýmen jalǵan qujatty paıdalanýdyń 8 deregi anyqtaldy, ıaǵnı Aqtaý kolledjderinde –5 oqytýshy, Qaraqııa aýdanynda – 3 oqytýshy jumys istegen.

Prokýrorlar barlyq faktiler boıynsha sotqa deıingi tergep-tekserýdi bastap materıaldardy odan ári tergep-tekserý júrgizý úshin polıtsııa organdaryna joldaǵan.

Mysaly, quqyq buzýshylardyń biri 2 jyl boıy Qaraqııa kásiptik kolledjinde jalǵan dıplommen tamaqtandyrýdy uıymdastyrý boıynsha oqytýshynyń jumysyn atqarǵan.

Qaraqııa aýdanynyń soty ony QR Qylmystyq kodeksiniń 385-babynyń 3-bóligi (kórineý jalǵan qujatty paıdalaný) boıynsha 30 saǵat qoǵamdyq jumystar túrinde jaza taǵaıyndaýmen qylmystyq jaýaptylyqqa tartty.

Osy tektes quqyq buzýshylyq úshin atalǵan sot sol kolledjdiń basqa eki oqytýshysyna qatysty úkim shyǵardy, olar jumystan bosatyldy.

Tórt epızod boıynsha polıtsııa organdarynyń sotqa deıingi tergep-tekserý júrgizgen qylmystyq isteri raqymshylyq aktisi boıynsha toqtatyldy.

Bir derek boıynsha sotqa deıingi tergep-tekserý áreketteri júrgizilýde.

Aıta keteıik, 2022 jyly prokýratýra uqsas faktiler boıynsha 14 qylmystyq is tirkegen jáne osy baǵyttaǵy jumystardy jalǵastyrýda.

Mańǵystaý oblysynyń prokýratýrasy azamattardy bolashaq urpaqqa qajetti bilim berý jáne kásibı ortany qoldaý úshin shynaıy bilim alýǵa shaqyrady.