Mańǵystaý oblysynda «Sergek» qosylǵan úsh kúnde 711 buzýshylyq anyqtaldy

AQTAÝ. QazAqtaý – 18 shildede Aqtaý qalasy men Munaıly aýdanynda «Sergek» ıntellektýaldy beınebaqylaý júıesi iske qosyldy. Alǵashqy úsh kúnde jol erejesin buzǵan 700-den astam júrgizýshi anyqtaldy, dep habarlaıdy QazAqparat tilshisi.

Aqtaý qalasy men Munaıly aýdanynyń joldarynda jáne qoǵamdyq oryndarda 1138 kamera ornatylǵan, onyń ishinde 736 kamera joldaǵy tártipti qadaǵalasa, 402 kamera qoǵamdyq oryndardy baqylaıdy.

«Sergek» júıesiniń kómegimen Mańǵystaý oblysynda jol-kólik oqıǵalary 30%, joldarǵy ólim- jitim men qoǵamdyq oryndardaǵy buzýshylyqtar 40% azaıady dep kútiledi.

«Qazaqstan joldarynda kún saıyn 10-nan asa adam jan tapsyrady. Kóptegen júrgizýshi jol erejesin elemegen, kóbi baǵdarshamnyń tyıym salý sıgnalynan ótken, jyldamdyqty arttyryp, qarsy jolaqqa shyqqan. «Sergek» júıesin ornatýdyń arqasynda júrgizýshilerdiń jol erejelerine baǵyný tártibi jaqsara túsetinine senemiz. Tipti qazirdiń ózinde nátıje baıqalady. Qala turǵyndary men qonaqtarynyń aıtýynsha, «Sergek» ornatylǵaly beri júrgizýshilerdiń kópshiligi avtomobıl jyldamdyqtaryn báseńdetken», - dedi Mańǵystaý oblystyq Polıtsııa departamenti aqparattandyrý jáne baılanys basqarmasynyń bastyǵy Álimbet Smaılov.

Bıylǵy 18-21 shilde aralyǵynda Mańǵystaý oblysynda avtomatty rejımde jumys isteıtin «Sergek» arnaıy tehnıkalyq quralynyń kómegimen 711 ákimshilik quqyq buzýshylyq anyqtalǵan, al ákimshilik is-júrgizýdiń biryńǵaı tizilimine 398 ákimshilik qaýly engizilgen.

Buzýshylyqtar týraly hattar kólik ıelerine eki túrli jolmen keledi: SMS jáne poshta.

Kólik júrgizýshisi aıyppuldy habarlama alǵannan keıingi 7 kún ishinde tólese, 50 paıyz jeńildik jasalady. Al habarlama alǵan sátten bastap 30 kúnde tólenbegen aıyppul, májbúrlep óndirýge jiberiledi.