Mańǵystaý oblysynda munaı qaldyǵymen lastanǵan 10 polıgon tazartyldy

AQTAÝ. QazAqparat – Mańǵystaý oblysynda munaı qaldyqtarymen lastanǵan 10 polıgon tolyqtaı tazartyldy. QR Ekologııa, geologııa jáne tabıǵı resýrstar mınıstri Maǵzum Myrzaǵalıev Twitter-degi paraqshasynda osylaı jazdy, dep habarlaıdy QazAqparat.

«Ekologııalyq mańyzy zor jumysty Mınıstrlik men «QazMunaıGaz «UK» AQ arasyndaǵy Qorshaǵan ortany qorǵaý salasyndaǵy yntymaqtastyq týraly memorandým aıasyndaǵy júzege asyrdyq. Keńes kezeńinen beri munda munaı qaldyqtarymen lastanǵan jerler 47 gektarǵa jetkenin atap ótýimiz kerek. Kompanııa sonyń ázirge 6 gektaryn, ıaǵnı 350 myń tonna topyraqty tazartty», dep jazdy Maǵzum Myrzaǵalıev .

Onyń aıtýynsha, endi topyraǵy qaıta óńdelgen aýmaq memlekettik baqylaý organdarynyń qaraýynda bolady. «Qazmunaıgaz» 2024 jylǵa deıin munaımen búlingen jerlerdi tolyq qalpyna keltirip berýge ýáde etip otyr.

«Mańǵystaý oblysy - elimizdegi ekologııa men qorshaǵan ortany qorǵaý máseleleri ótkir turǵan óńirlerdiń biri. Sondyqtan ekologııa mınıstrligi tabıǵat paıdalanýshylardyń jaýapkershiligin arttyryp, jergilikti halyqpen tyǵyz baılanystaǵy jumysty jalǵastyra beredi», - dedi mınıstr.