Mańǵystaý oblysynda gıbrıdti elektr stansasy salynady
«QazMunaıGaz» UK AQ basqarma tóraǵasy Maǵzum Myrzaǵalıev 25 qańtar kúni Astana qalasynda Eni S.p.A. (ENI) munaı-gaz kompanııasynyń tabıǵı resýrstar bóliminiń barlaý jáne óndirý jónindegi dırektory Lýka Vınıatı bastaǵan ıtalııalyq delegatsııamen kezdesti.
QMG men ENI ekijaqty yntymaqtastyq máselelerin talqylap, Mańǵystaý oblysynda jańartylatyn energııa kózderi (kún+jel) jáne gazben (elektrmen qamtýdy turaqtandyrý jáne gaz resýrsyn únemdeý úshin manevrlik qýat retinde) jumys isteıtin, qýaty 120 MVt gıbrıdti elektr stansasyn salý jobasyn birlesip iske asyrýǵa kelisti.
«Bul joba — qos kompanııanyń birlesken tabysty jumysynyń nátıjesi jáne Memleket basshysynyń «jasyl» jobalardy damytý jónindegi strategııalyq tapsyrmasyn iske asyrý jolyndaǵy qadam. Bastama óńirdiń energetıkalyq qaýipsizdigin nyǵaıtyp qana qoımaı, ınvestıtsııanyń kelýine jáne jańa jumys oryndarynyń ashylýyna múmkindik beredi», — dedi Maǵzum Myrzaǵalıev.
Sonymen qatar kelissóz kezinde elektr energııasyn maqsatty nysandar úshin (atap aıtqanda, «Ózenmunaıgaz» jáne Qazaq gaz óńdeý zaýytynyń nysandary qaralýda) óndirý men jetkizý óndiriste jıi bolatyn elektr energııasynyń irkilisi saldarynan apattyq toqtap qalý qaýipin joıýǵa múmkindik beretini aıtyldy.
Jobany iske asyrý merzimi — 2023-2025 jyldar (jospar boıynsha kún generatsııasynyń blogy 2024 jyly, al jel men gaz blogy 2025 jyly iske qosylady, boljammen bıýdjet mólsheri shamamen 300 mln AQSh dollary).
Gıbrıdti elektr stansany salý jónindegi kelisim — QMG men ENI kompanııalarynyń 2021 jyldyń shildesinde qol qoıǵan elektr energııasyn óndirý jáne ótkizý úshin energetıkalyq aýysý jobalaryn ázirleýdegi yntymaqtastyq týraly memorandým aıasyndaǵy jumysynyń jalǵasy.
Foto: www.kmg.kz