Mańǵystaý oblysynda bıýdjettik kiris máselesine qatysty keńeıtilgen keńes ótti
Basty másele - salyqtan jaltarǵan salyq tóleýshiler men oblys aýmaǵynda bıýdjetke qosymsha kiris kózderin tabý jaıynda boldy. Óńir basshysy Eraly Luqpanuly zańdy túrde belgilengen salyqtardy, alymdar men ózge de mindetti tólemderdi tóleý ár azamattyń boryshy ekenin eskertti. Óıtkeni qazirgi kúni óńirdegi ózekti máseleniń biri el qazynasyna tıesili salyqqa - salyqtóleýshilerdiń nemquraılyǵy.
Jıynda Mańǵystaý oblysy boıynsha memlekettik kirister departamentiniń basshysy Danııar Janalınov memlekettik bıýdjettiń kiris bóligin oryndalý qorytyndylary boıynsha baıandady.
Ol óz baıandamasynda jergilikti jáne respýblıkalyq bıýdjetterdiń kiris bóligin oryndaý máselelerine toqtalyp, Mańǵystaý oblysy boıynsha 2018 jyldyń qıyrkúıek aıyna deıingi derektermen bólisti.
Jergilikti bıýdjet kiristeri boıynsha jospar 88,9% oryndaldy (jospar 103 168,6 mln.teńge bolsa, is júzinde 91 683,3 mln. teńge tústi, 11 485,3 mln. teńge oryndalmady). Aǵymdaǵy jyldyń qorytyndysy boıynsha jergilikti bıýdjetke kútiletin túsimder 132 915,5 mln.teńgeni quraıdy, bul bekitilgen jospardan 7 042,9 mln. teńgege nemese 95,0%-ǵa az (jospar-139 958,4 mln. teńge)
Danııar Janalınov óz baıandamasynda shaǵyn jáne orta bıznes sýbektilerine qatysty, atap aıtqanda iri saýda úıleri, Aqtaý qalasynyń bazarlaryna qatysty máseleni atap ótti. Sonymen qatar, jyljymaıtyn múlikti tirkeý jónindegi ýákiletti organdarda eskerilmegen iri jeke úıler men kottedjderdiń múlik salyǵy men jer salyǵy týraly olqylyqtardy ortaǵa saldy.
Sondaı-aq ol, eńbekaqy tóleý qoryn jasyratyn jáne qyzmetkerler boıynsha eń tómengi jalaqyny kórsetetin salyq tóleýshiler boıynsha atqarylǵan jumystardy usyndy, sheteldik jumys kúshin tartatyn zańdy tulǵalardyń jeke tabys salyǵyn tóleýden jaltarý, suıytylǵan gazben bólshek saýda naryǵynda salyq tóleý máselelerin kóterdi, qorshaǵan ortaǵa emıssııalar úshin tólemniń tolyq túsýin qamtamasyz etý boıynsha, menshiginde kólik quraldary bar zańdy tulǵalardyń kólik quraldaryna salynatyn salyq boıynsha jeke tulǵalardyń bereshegi týraly jáne ony óndirip alý boıynsha jeke sot oryndaýshylarynyń jumysyndaǵy problemalar týraly, munaı men gaz óndirýmen aınalysatyn jer qoınaýyn paıdalanýshy zańdy tulǵalar taratýǵa bergen munaı shlamdary men burǵylaý qaldyqtarynyń mólsheri týraly málimetterdi alý kezindegi máseleler boıynsha kólik quraldaryna salynatyn salyqty tóleýden jaltarý jóninde júrgizilgen jumystardyń nátıjeleri aıtyldy.
Keńeste kóterilgen máselelerdi eskere otyryp, Mańǵystaý oblysynyń ákimi Eraly Toǵjanov barlyq ýákiletti organdarǵa, qala jáne aýdan ákimderine birqatar tapsyrmalar berdi. Salyqtan jaltarǵan nemese jalǵan derek kórsetip memlekettik tólemnen jaltarǵan jeke jáne zańdy tulǵalarǵa arnaıy tekseris júrgizip, bir aı boıy quzyrly organdarǵa reıd uıymdastyrýdy tapsyrdy jáne turǵyndarǵa óz erkimen azamattyq boryshy retinde óz erkimen salyq tóleýge shaqyrdy.