Mańǵystaý oblysynda basqarma basshysynyń týǵan kúnine qatysqandar jazalandy

AQTAÝ. QazAqparat – Mańǵystaý oblysynda karantın talaptaryn buzyp, Ekonomıka jáne bıýdjettik josparlaý basqarmasy basshysynyń týǵan kúnine qatysqan memlekettik qyzmetshiler jazalandy. QazAqparat tilshisi bul týraly Memlekettik qyzmet isteri agenttiginiń óńir boıynsha departamentine silteme jasap habarlaıdy.

Mańǵystaý oblysynda Ádep jónindegi keńestiń kezekti otyrysynda jergilikti atqarýshy organdardyń laýazymdy tulǵalarynyń is-áreketine qatysty birneshe tártiptik is qaraldy.

Departamenttiń málimetinshe, otyrys barysynda bıylǵy 14 qyrkúıekte týǵan kúnin dúrkiretip toılaǵan oblystyq Ekonomıka jáne bıýdjettik josparlaý basqarmasynyń basshysy Marına Álbekovanyń áreketi qaraldy.

«Sharaǵa qatysqan qyzmetshilerdiń túsindirýinshe, olar Mańǵystaý aýdanynda ornalasqan «Aıraqty» taýyna saıahatqa shyǵyp, sporttyq oıyndar ótkizgen. Sol jerden túski as iship, qyzmetshilerge ózderimen alyp kelgen shaǵyn syılyqtaryn taratqan. Bul sharanyń maqsaty «qyzmetshiler arasynda korporatıvtik mádenıetti qalyptastyrý» dep kórsetken. Alaıda, keńes músheleri bul túsindirmelerdi «jazadan qutylýǵa áreket» dep qabyldady», - delingen habarlamada.

Eske salsaq, M. Álbekova QR ÁQBtK-niń 425-baby 1-bóligimen ákimshilik jazaǵa tartylǵan bolatyn. Bul bap boıynsha laýazymdy tulǵalar 230 AEK, ıaǵnı 638 940 teńge kóleminde aıyppul tóleýge mindetteledi. Sondaı-aq Mańǵystaý oblysy ákiminiń 14 qyrkúıektegi ókimimen oǵan «sógis» túrinde tártiptik jaza qoldanylǵan.

Ádep jónindegi keńes osy sharaǵa qatysqan basqa da laýazymdy tulǵalarǵa jaza qoldanýdy usyndy.

«Mańǵystaý oblysynyń Ekonomıka jáne bıýdjettik josparlaý basqarmasy basshysynyń orynbasaryna, Mańǵystaý aýdany ákiminiń orynbasaryna, Mańǵystaý aýdanynyń qurylys, sáýlet jáne qala qurylysy bóliminiń basshysyna, Mańǵystaý jáne Munaıly aýdandyq ekonomıka jáne josparlaý bóliminiń basshylaryna qatysty tártiptik ister keńeste talqylandy. Sharaǵa qatysqan basshy laýazymdaǵy memlekettik qyzmetshilerdiń is-áreketinde Ádep kodeksiniń birneshe tarmaǵy buzylǵan dep taýyp, basym kópshilik daýyspen olarǵa «qatań sógis» túrinde tártiptik jaza qoldanýdy usyný qajet dep sheshti», - dedi vedomstvodan.