Mańǵystaý oblysynda balyq ósirýge 20 mln teńgeden astam sýbsıdııa bólindi
20 mln teńgeniń balyq azyqtaryn satyp alýǵa 17 mln 750 myń teńge, dárilik preparattardy satyp alýǵa 40 myń teńge, balyq ósirý materıalyn satyp alý shyǵystaryn óteýge 1 mln 200 myń teńge, balyq basyn tolyqtyratyn analyq balyq úıirin satyp alýǵa jáne kútip ustaýǵa 510 myń teńge jáne balyq ósirý bıologııalyq negizdemesin jasatý shyǵyndaryn óteýge 1 mln teńge bólingen.
Óńirde balyq sharýashylyǵyn qoldaý baǵytynda 2022 jyldan bastap 2023 jyldyń shildesine deıin kásipshilik balyq aýlaýǵa 8 974 tonna kvota berilgen. Búginde onyń 4 915 tonnasy ıgerildi.
«Bıyl memleket balyq sharýashylyǵyn damytý úshin sýbsıdııadan bólek birqatar qoldaý sharalarymen qamtamasyz etýde. Qazirgi tańda balyq ósirý sharýashylyqtaryn sý qorǵaý beldeýine ornalastyrýǵa shekteýler alynyp tastaldy. Sonymen qatar 2022 jyly óńirimizde 793 balyqshy tirkelse, bıyl olardyń sany 1 myńǵa jýyqtady. Bul kórsetkishtiń barlyǵy balyq sharýashylyǵynyń damyp kele jatqanyn kórsetedi», - dedi Mańǵystaý oblystyq Balyq sharýashylyǵy basqarmasynyń basshysy Arman Moldashev brıfıng barysynda.
Mańǵystaýlyq kásipkerlerdiń asyl tuqymdy balyq ósirýdi damytý úshin qarajat alýǵa mol múmkindigi bar.
«Sýbsıdııalar jergilikti bıýdjette tıisti jyldyń 1 naýryzynan 1 jeltoqsanyna deıin kózdelgen qarajat esebinen tólenedi. Ony alý úshin kezekte.kz veb-portalyna jeke nemese zańdy tulǵa retinde tirkelesiz. Tirkelý sátti aıaqtalǵannan keıin jeke kabınetke kirip, servıster bóliminen «BALYQŞY», onyń ishinde «Akvaósirý» bóligindegi qajetti shyǵystardy óteý boıynsha sýbsıdılaý batyrmasyn basý kerek. Qosymsha suraqtar boıynsha Mańǵystaý oblysynyń Balyq sharýashylyǵy basqarmasynyń qyzmetkerlerine júginýge keńes beremin», - dedi ol.