Mańǵystaý oblysynda 5 jasar qyz jedel járdem kóliginde kóz jumdy

JAŃAÓZEN. QazAqparat – «Kendirli» demalys ortalyǵynda qutqarýshylar 5 jasar qyzdy sýdan alyp shyqty. Alǵashqy medıtsınalyq kómek kórsetý kezinde qyzdyń tamyry soǵyp turǵan. Alaıda bala aýrýhanaǵa bara jatqan jolda kóz jumdy. Bul týraly Mańǵystaý oblysy TJD Daǵdarys jaǵdaılarynda basqarý basqarmasynyń basshysy Nurjan Borashev málim etti, dep habarlaıdy QazAqparat lada.kz saıtyna silteme jasap.

1 tamyz kúni saǵat 21:50-de Daǵdarys jaǵdaılarynda basqarý bólimine mamandandyrylǵan órt sóndirý bóliminiń (ÓSB-3) dıspetcherinen 2018 jyly týǵan qyz balanyń sýdan qutqarylǵany týraly aqparat kelip tústi. Bala Jańaózen qalasynan 65 shaqyrym jerde ornalasqan «Kendirli» demalys ortalyǵynyń sýǵa túsýge jabdyqtalǵan aımaǵynda shomylǵan.

Vedomstvonyń habarlaýynsha, alǵashqy medıtsınalyq kómek kórsetý kezinde qyzdyń tamyry soǵyp turǵan.«Alaıda, 103 dıspetcheriniń málimetinshe, qyz aýrýhanaǵa bara jatqan jolda kólikte qaıtys boldy. «Bıologııalyq ólim» dıagnozy qoıyldy. Mán-jaıdy anyqtaý úshin sot-medıtsınalyq saraptama taǵaıyndaldy», - dedi Nurjan Borashev.