Mańǵystaý oblysynda 346 otbasy ataýly áleýmettik kómekti zańsyz alǵan

AQTAÝ. QazAqparat – Mańǵystaý oblysynda ataýly áleýmettik kómek taǵaıyndalǵan 346 otbasyna qarajat artyǵymen tólengen. Ásirese, Mańǵystaý aýdanyndaǵy árbir tórtinshi januıada tabys kólemi qate eseptelgen, dep habarlaıdy QazAqparat tilshisi.

Bul týraly oblystyq Jumyspen qamtýdy úılestirý jáne áleýmettik baǵdarlamalar basqarmasynyń basshysy Qýanysh Berishbaev málim etti.

Onyń aıtýynsha, oblys turǵyndarynyń 6%, ıaǵnı 7406 otbasy AÁK alýshylar qatarynda. Bul - kedeıshilik deńgeıinen tómen ómir súretinder. Onyń 5% qarajat artyǵymen tólengeni anyqtaldy.

«Árbir tórtinshi áleýmettik kómek durys taǵaıyndalmaǵan. 10 mln teńgeden astam qarajat adamdardyń tabysy durys eseptelmeýine baılanysty artyq tólendi. Ásirese, Mańǵystaý aýdanynda bul jaǵdaı jıi tirkelip otyr», -deıdi Qýanysh Berishbaev.

Basqarma basshysynyń orynbasary Qarashash Nurmámedovanyń sózinshe, mundaı qatelikke negizinen aqparattyq júıe sebep bolǵan. Keıbir otbasylar aı saıyn jalaqydan túsetin zeınetaqy jarnasyn kórsetpegen. ıAǵnı, keshigip túskender, «zeınetaqy jarnasy joq» dep bilgilegen. Osylaısha, aqparattyq portal muny kórmegen.

«Memlekettik ataýly áleýmettik zańda ótinish berýshi ózi jaýap beredi, zeınataqy jarnasy kesh tússe de, ol adam naýryz aıynda jalaqyny aldy ǵoı, jasyryp, jalaqy almaǵandaı, tabysy bolmaǵandaı, zańsyz alyp ketti. Osy zańnyń 7-baby, 2-tarmaǵynda jalǵan málimet usynǵany úshin qarajat erikti túrde, bolmasa sot arqyly qaıtarýǵa jatady. Mınıstrlik arqyly jiti qadaǵalaýǵa alyndy. Qazir árbir adamnyń tabysyn onlaın kórýge múmkindik týdy. Al, endi kórineý jalǵan aqparat usynyp, zańsyz qarajatty ıemdengen adamdardan ony zań júzinde qaıtaramyz», - dedi Qarashash Nurmámedova.

Mańǵystaý oblysynyń ákimi Serikbaı Trumov atalǵan olqylyqtardy 1 qyrkúıekke deıin túzetýge tapsyrma berdi.

«Árbir aýdan, qala ózderindegi komıssııalarmen jumys jasaýy tıis. Ár úıdi qaraý qajet, kórý kerek. AÁK komıssııa usynysymen ǵana taǵaıyndalady. Ár aýdan, aýyl úshin qıyn emes», - dedi ol.