Mańǵystaý oblysynda 3 myńnan astam múgedektigi bar turǵynnyń quqyǵy buzylǵan

AQTAÝ. QazAqparat – Mańǵystaý oblysynda 3 myńnan astam múgedektigi bar turǵynnyń memleket kepildik bergen tegin qyzmetterdi alý boıynsha quqyǵy buzylǵan. Bul týraly QazAqparat oblystyq prokýratýranyń baspasóz qyzmetine silteme jasap habarlaıdy.

Mańǵystaý oblysynyń prokýratýrasy múgedektigi bar jandarǵa memleket kepildik bergen tegin qyzmetterdi alý kezinde zańdylyqtyń saqtalýyna taldaý júrgizdi. Taldaý barysynda 3 258 adamdy ońaltýdyń jeke baǵdarlamasymen qamtamasyz etý boıynsha tıisti sharalar qoldanbaý faktileri anyqtaldy. Onyń 525-i – birinshi, 849-y – ekinshi, 1 322-siniń úshinshi toptaǵy múgedektigi bar. Sondaı-aq, 562-si – bala.

Engizilgen prokýrorlyq qadaǵalaý aktisimen kemshilikter joıylyp, kináliler tártiptik jaýapkershilikke tartyldy.

Aıta ketsek, múgedektigi bar jandardyń arnaýly ońaltý ortalyǵyna barýǵa, sanatorıı-kýrorttyq em alýǵa, sondaı-aq jeke kómekshiniń áleýmettik qyzmetterine jáne basqa da memleket kepildik bergen tegin qyzmetterge quqy bar.