Mańǵystaý oblysyna túrli óńirlerden JOO-nyń úzdik túlekteri tartylady - Ashat Aımaǵambetov
«Keshe jumys saparymen Mańǵystaý oblysyna bardym. Jańaózen men Aqtaý qalalarynda ornalasqan mektepter, balabaqsha, kolledj, ýnıversıtet jáne stýdenttik jataqhanalarda boldym. 21 «Aızere» balabaqshasynyń jumysymen tanystym. Jańaózendegi 22 mekteptiń materıaldyq-tehnıkalyq jabdyqtarmen qamtylýyn, oqý kabınetterin, beınebaqylaý kameralarymen jáne dabyl túımelerimen jabdyqtalýyn tekserdim. Sondaı-aq «Kaspıı» kolledjiniń jumysymen tanystym. Aqtaýda 1200 orynǵa shaqtalǵan jańa mekteptiń qurylysy júrip jatyr, nysandy osy jyldyń ortasyna qaraı tapsyrý josparlanyp otyr. Sonymen qatar 29 mekteptiń irgesin keńeıtý maqsatynda júrip jatqan japsarlas qurylystyń jumysymen tanystym», - dep jazdy Bilim jáne ǵylym mınıstri Ashat Aımaǵambetov áleýmettik jelidegi paraqshasynda.
Onyń aıtýynsha, bilim oshaǵynyń jaqynda salynǵanyna qaramastan, jańa turǵyn úı keshenderiniń boı kóterýine baılanysty aýdanda oqýshy oryndarynyń tapshylyǵy týyndady. Merdiger bir aı ishinde bul máseleniń ornyn toltyratyn keńeıtý qurylysyn aıaqtaýǵa ýáde berdi.
«Sondaı-aq «Yessenov University» joǵary oqý ornyna baryp, akademııalyq artyqshylyq ortalyǵyn qurý jobasynyń prezentatsııasymen tanystym. Oqý korpýsyn aralaýmen qatar stýdentter turatyn jataqhanaǵa baryp, ýnıversıtettiń jańa jataqhanasynyń qurylys barysymen tanystym. Joǵary oqý orny búkil óńir úshin kadrlar daıarlaıtyndyqtan, jyl saıyn oqýǵa jáne stýdentter kontıngentine suranystyń ósýimen qatar, stýdentterdi jataqhanamen qamtamasyz etý qajettiligi de artyp keledi», - dedi mınıstr.
Osy oraıda ol mundaı saparlar barysynda tárbıeshilermen, muǵalimdermen , mektep jáne kolledj dırektorlarymen, sondaı-aq JOO-nyń oqytýshylarymen tildesý óte mańyzdy ekenin jetkizdi.
«Mańǵystaý oblysynda da qalyptasqan dástúrge saı áriptestermen kezdesý ótkizip, barlyq ıdeıa men usynystardy tyńdap, olardy tolǵandyrǵan nemese qyzyqtyrǵan suraqtarǵa jaýap berdim. Mektep dırektorlarymen kezdesý barysynda óńirge pedagogterdi tartý, mamandardy daıarlaý jáne biliktiligin arttyrý boıynsha jańa joba talqylandy. Sondaı-aq Jańaózen qalalyq máslıhatynyń depýtattarymen júzdesip, olardyń qaladaǵy bilim berýdi damytý jónindegi usynystaryn tyńdadym. Arnaıy áleýmettik paket usynyp, túrli óńirlerden JOO-nyń úzdik túlekterin belsendi túrde tartatyn aımaqtardyń qataryna Mańǵystaý oblysy da kiretinin atap ótkim keledi. Muǵalimderdiń biliktiligin arttyrý boıynsha keshendi sharalardy júzege asyrý da mańyzdy. Ol úshin bilim berý uıymdarynyń dırektorlaryna da, muǵalimderge de arnaıy kýrstar uıymdastyratyn bolamyz», - dedi vedomstvo basshysy.
Sonymen qatar ol óńir úshin oqýshy oryndarynyń tapshylyǵy máselesi de ózekti ekenin jetkizdi. Oqýshylar sany ótken jylmen salystyrǵanda 9,5 myń balaǵa artty.
«Suranys artqandyqtan, oblysta 24 mektep jáne jumys istep turǵan mektepterge qosymsha taǵy 11 japsarlas qurylys salynatyn bolady. Onyń ústine oblys ortalyǵynda ǵana emes, suranysqa sáıkes Jańaózen qalasy men oblystyń basqa da aýdandarynda jańa ári zamanaýı mektepter boı kótermek. Budan bólek, erekshe bilim berýdi qajet etetin balalarǵa arnalǵan túzetý kabınetteri ashylady. Oblysta qosymsha bilim berý júıesin damytý, balalarǵa arnalǵan jańa sektsııalar men úıirmeler ashý mańyzdy mindet bolyp sanalǵandyqtan, osy baǵytta jumys júrgiziledi», - dep túsindirdi A. Aımaǵambetov.
«Oblysta shetel ýnıversıtetiniń fılıalyn ashý, jumys istep turǵan Sh.Esenov atyndaǵy ýnıversıtetti damytý, ýnıversıtette Akademııalyq utqyrlyq ortalyǵynyń ashylýy, oǵan oqý ǵımaraty men jataqhananyń salynýy, oblys mektepteriniń túlekterine elimizdiń jetekshi tehnıkalyq joǵary oqý oryndarynda bilim alýy úshin qosymsha ataýly granttardyń bólinýi de basty mindetterdiń biri. Sapar qorytyndysy boıynsha bizdiń sala úshin ózekti barlyq másele baqylaýǵa alynady jáne tıisti tapsyrmalar berildi», - dedi mınıstr.