Mańǵystaý oblysyna «Spýtnık-V» vaktsınasynyń 1 myń dozasy jetkizildi

AQTAÝ. QazAqparat – Mańǵystaý oblysynda «COVID-19» ınfektsııasyna qarsy «Spýtnık-V» vaktsınasynyń 1000 dozasy arnaıy ushaqpen jetkizildi. Bul týraly Qoǵamdyq kommýnıkatsııa ortalyǵynan málim boldy dep habarlaıdy QazAqparat.

Oblystyq densaýlyq saqtaý basqarmasynyń bólim basshysy Ǵalııa Qalıevanyń málimetinshe, «SK-Farmatsııa» JShS jetkizgen vaktsınalar oblystyq densaýlyq saqtaý basqarmasynyń vaktsınatsııalyq qoımasynda saqtalady.

«Aldymen, erikti túrde ınfektsııalyq aýrýhanada jumys isteıtin medıtsına qyzmetkerlerine ekpe salynady. Munan soń jedel járdem, emhanada qyzmet etetin mamandar egiledi.

Aıta ketetin jaıt erikti túrde vaktsına alatyn adamda profılaktıkalyq egýge qarsy kórsetilimder bolmaýy tıis. Vaktsınalaý aldynda dárigerdiń mindetti tekserý jumystary júrgiziledi», -dedi Ǵalııa Qalıeva.

Jyldyń sońyna deıin Mańǵystaýǵa qazaqstandyq «Qaz Covid-in» vaktsınasynyń 100 myńy jetkiziledi dep josparlanyp otyr.