Mańǵystaý oblysyn damytýda aqparattyq tehnologııalar naryǵyn paıdalaný kerek - Prezıdent

ASTANA. QazAqparat –Memleket basshysy Qasym-Jomart Toqaev Úkimettiń keńeıtilgen keńesinde mańǵystaý oblysynyń jastaryn basqa da kásipterge ma mamandandyrýdy tapsyrdy, dep habarlaıdy QazAqparat tilshisi.

«Jańaózende bolǵan jarylystyń saldaryn joıý jumystaryn tez arada bitirý qajet. Jalpy, Jańaózen – munaı-gaz salasyna ǵana qarap otyrǵan monoqala. Sol sebepti, biz ony damytý úshin arnaıy keshendi jospar qabyldadyq. Osy qujatty meılinshe júzege asyrý kerek. Úkimet te bul jumysqa jaýapty bolady.

Batysta, ásirese, Mańǵystaýda, jastar kóbine munaıshy bolǵysy keledi. Bul – durys emes. Munaı qory taýsylǵanda aımaqtaǵy ahýal tipti kúrdeli bolyp ketýi múmkin. Sondyqtan jastardyń basqa da kásipterdi ıgerýine jaǵdaı jasaýymyz kerek», - dedi Prezıdent.

Qasym-Jomart Toqaev bul jumystar arnaıy jospar boıynsha atqarylý kerektigin atap ótti.

«Mysaly, búgingi zamannyń ózekti salasy – aqparattyq tehnologııalar. Osyndaı tehnologııalardy Mańǵystaý oblysyn damytý isinde qoldanýǵa bolady. Jalpy, biz kózi ashyq, bilimdi jastardy tárbıeleýimiz kerek. Óskeleń urpaq keleshekke senimmen qaraýy qajet. Bul úlken jumys. Bul ákimniń, Úkimettiń quzyrynda turaqty túrde bolý kerek», - dedi Memleket basshysy.

Aıta keteıik, Úkimet úıinde Prezıdent tóraǵalyǵymen eldiń áleýmettik-ekonomıkalyq damý máseleleri jóninde keńes ótip jatyr.