Mańǵystaý oblysy Maqtaaral aýdanyna 77,5 tonna gýmanıtarlyq kómek jiberdi

NUR-SULTAN. QazAqparat - Mańǵystaý oblysy Maqtaaral aýdanyna 77,5 tonna júk jiberdi. Bul týraly Ortalyq kommýnıkatsııalar ortalyǵynyń óńirlik fılıalynda ótken brıfıngte MO ishki saıasat basqarmasy basshysynyń orynbasary Nurtas Salı málimdedi.

Túrkistan oblysy Maqtaaral aýdanynda oryn alǵan tótenshe jaǵdaıǵa baılanysty zardap shekken turǵyndarǵa kómek kórsetip, qoldaý bildirý maqsatynda Mańǵystaý oblysynda gýmanıtarlyq kómek jınaý pýnkteri uıymdastyryldy.

Pýnkterde júk jınaý jumystary 4 – 9 mamyr aralyǵynda qalalar men aýdandardaǵy jastar resýrstyq ortalyqtarynyń bazasynda jáne iri azyq-túlik dúkenderi men bazarlardyń aldynda júrgizildi.

Gýmanıtarlyq júktiń ishinde uzaq saqtalatyn azyq-túlikter, kıim-keshekter men tósek-jabdyqtar, dári-dármekter jáne gıgıenalyq quraldar qamtyldy.

Alǵashqy gýmanıtarlyq kómek 7 mamyr kúni Maqtaaral aýdanynan eń shalǵaı óńir — Jańaózen qalasynan jóneltildi. 7 gazel avtokólikpen jalpylaı eseptegende 7,5 tonnaǵa jýyq gýmanıtarlyq júk jiberildi.

Ekinshi gýmanıtarlyq kómek 9 mamyr kúni Aqtaý qalasynan jáne Beıneý, Munaıly, Qaraqııa aýdandarynan jiberildi. 2 fýra jáne 14 gazel avtokólikpen jalpylaı eseptegende 70 tonnaǵa jýyq gýmanıtarlyq júk maqtaaraldyqtarǵa jóneltildi.

«Jalpylaı alǵanda, osy aralyqta 77,5 tonnaǵa jýyq gýmanıtarlyq júk Mańǵystaý jurtshylyǵy atynan túrkistandyqtarǵa jetkizildi», - dedi Nurtas Salı.

Búgingi kúni Túrkistan oblysynda arnaıy júk jınaý qoımalary uıymdastyrylyp, turǵyndarǵa taratý jumystary júrgizilýde.