Mańǵystaý oblysy Arystaǵy 8 kósheni qalpyna keltirip jatyr
Arystaǵy turǵyn úılerdi qalpyna keltirý jumystary óńirimizdiń 8 iri qurylys kompanııasyna júktelip otyr. Olar: «Ońdasyn Stroı», «Aq jol qurylys», «Alıans LTD», «Aqtaý BS Stroı», «AS qurylys», «Aıkom LTD» jáne «Sheber Qurylys» jaýapkershiligi shekteýli seriktestikteri. Sonymen qatar, qurylys jumystaryna Arys qalasynyń jumyssyz turǵyndary tartylady.
Qazirgi tańda qurylys jumystary qarqyn alýda. Qajetti tehnıkamen qamtamasyz etilip, jumysshylar qurylysty bastap ketken. Naqtyraq aıtqanda, 5 kósheniń 12 úıin jóndeý jáne 1 turǵyn úıdi qaıta salý jumystary bastaldy. Ázirge jumyldyrylǵan jumysshylar sany 50 adamdy qurap otyr jáne adamdar sany kún saıyn qajetti kólemge deıin kóbeıe bermek. 2-shilde kúni qajetti materıaldar, sonyń ishinde 12 000 m² shatyr jabyndysy, 140 m³ aǵash jáne basqa da birinshi kezekte shatyrlardy jóndeıtin qurylys jabdyqtary alynǵan. Sonymen qatar, 5 kóshede ornalasqan úılerdiń terezeleriniń ólshemderi alynyp, daıyndalyp jatyr jáne búginnen bastap 2 kósheniń turǵyndary úılerine ornatylady.
«Arys qalasyn qalpyna keltirý boıynsha El Prezıdenti Q.Toqaev úkimetke jáne oblys ákimderine arnaıy tapsyrma bergen bolatyn. Mańǵystaý oblysy nomeri 4-shi sektorǵa jaýapty retinde bekitilgen. Bul aýmaqta 8 kóshe, 331 úı ornalasqan. Al jóndeýge jatatyn úılerdiń sany - 275, jóndeýge kelmeıtin, ıaǵnı buzyp, jańa úı salýdy qajet etetin úıler sany - 3. Bul úılerdiń barlyǵy da jeke turǵyn úıler. Bul jumystarǵa jaýapty retinde oblys ákiminiń orynbasary Qılybaı Nurdáýlet Igilikuly bekitildi. Óńirden attanǵan 9 eksperttik mekemeniń 18 ókili zardap shekken turǵyn úılerdiń tolyqtaı defektilik aktilerin ázirledi. Jóndeý jumystary tamyz aıynyń birine deıin aıaqtalady dep josparlanýda»,-dedi óńir basshysy S.Trumov.