Mańǵystaý oblystyq máslıhat depýtattyǵyna úmitkerler aýyl turǵyndarymen júzdesti

ASTANA. QazAqparat - Búgin Mańǵystaý oblystyq máslıhat depýtattyǵyna úmitker kandıdattar Anar Shamshadınova, Raýshan Aımýrzaeva, Jambolat Tangıev Mańǵystaý aýdanynyń Jarmysh aýylyna baryp, úgit-nasıhat jumystaryn júrgizdi. «AMANAT» partııasynyń aldaǵy bes jyldaǵy óńirdi damytýǵa arnalǵan josparymen bólisti, dep habarlaıdy QazAqparat.

Toǵyz joldyń toraby bolǵan aýylda aýylsharýashylyǵy jaqsy damyǵan. Dese de aýylǵa qatysty aıtar máseleleri jetip artylady. Aýyl úlkenderi men mádenıet úıiniń qyzmetkerleri qatysqan jıynda aýyldaǵy aýyz sý máselesi qozǵaldy. Aıadaı aýylda aýyz sý máselesi sheshilmeı kele jatqanyn kóterdi.

Oblystyq máslıhat depýtattyǵyna úmitker Anar Amangeldiqyzy Mańǵystaýdyń qarashańyraǵy bolǵan aýdanda kúrmeýi sheshilmeı kele jatqan máselelerdiń baryn ashyp aıtty. Partııanyń aldaǵy bes jylǵa arnalǵan josparynda aýyldy damytý basty nazarǵa alynǵanyn, aýylsharýashylyq ónimderin damytyp, aýyz sý máselesin sheshý josparda baryn jetkizdi.

Jumystyń joqtyǵynan aýyl jastary óz bıznesterin bastap, aýylsharýashylyǵyn damytqysy keledi. Dese de oblys ortalyǵynda aýylsharýashylyǵyn damytýǵa arnalǵan bıznes jobalary birneshe márte qoldaý tappaǵanyn aıtty.

Osy oraıda sóz alǵan jeke kásipker Raýshan Aımýrzaeva kásipke kelý ońaı emes ekenin aıtyp, dese de jobalaryn qaıta qarap, ózimen baılanysýyn surady. Kásiptiń qyr-syrynan habardar ol istiń bastalýyna meılinshe jol silteýge daıyn ekenin jetkizdi.

Ákim men depýtatqa senimi joǵalǵan aýyl turǵyndary aýylda jańadan salynǵan mádenıet úıiniń áli kúnge eshkimniń balansyna berilmeı otyrǵanyna qamyǵyp, osy máseleni sheship berýlerin surady. Búgingi kezdesýge kelip, erteńge eńbek etemiz degen jastarǵa batasyn berip, qoldaý bildirdi.

Tapsyrys berýshi: N.Qarasaev.

Mańǵystaý oblystyq máslıhaty depýtattarynyń saılaýynda partııalyq tizimdi usynǵan «AMANAT» partııasy Saılaý qorynyń qarajatynan tólendi.