Mańǵystaý aýdanynda 15 aýyl ınternetpen qamtamasyz etildi

AQTAÝ. QazAqparat – Mańǵystaý oblysy Mańǵystaý aýdanyndaǵy Beki aýylynda uıaly baılanys pen ınternet jelisi iske qosyldy. Turǵyn úılerge ınternet tartý jumysy bıýdjet esebinen tegin júrgizildi. ıAǵnı, ár úıge ınternet kirgizý úshin turǵyndardan eshqandaı tólem alynǵan joq, dep habarlaıdy QazAqparat tilshisi.

«Sondaı-aq bıyl aýdanda eń nátıjeli qyzmetimiz - aýyldyq jerlerdi ınternetpen qamtý baǵyty. Ásirese, kópten kútken Beki aýylynda uıaly baılanys pen ınternet jelisi iske qosylǵany aýdan halqyn qýantqan jáıt boldy. Jalpy quny 15 mln teńge bolǵan ınternet tartý jumysyn «Spetsavtomatıka» mekemesi júrgizdi. Sondaı-aq, Beki eldi mekenine jaqynda ǵana Kcell operatory arqyly uıaly baılanys ornady. Jyl sońyna deıin Tele2 operatorynyń ınterneti keledi dep kútip otyrmyz», - deıdi Mańǵystaý aýdanynyń ákimi Tilek Kóshmaǵanbetov.

Sondaı-aq, oblystaǵy «Manat» asýyn mobıldi baılanyspen qamtý úshin antenna dińgektiń qańqasy turǵyzyldy. Endi toq jáne ınternet jelisin tartý jumysy qalyp tur. Joba quny – 63 mln teńge.

Budan bólek, Mańǵystaý aýdanyna qarasty Otpan aýyldyq okrýgine qarasty 15-beket eldi mekenine «Transtelekom» mekemesi arqyly ınternet tartyldy. Bekettegi 15 úı tolyqtaı ınternet jelisine qosyldy.

Al, Tuşybek aýylyna ınternet júrgizýge «Tehtsentr-master» JShS-men kelissóz júrgizilip, qarjy bólý josparlanyp otyr. Sondaı-aq, Bozashynyń tórt aýyly - Aqshymyraý, Qyzan, Tuşyqudyq, Shebir aýyldarynda Beeline operatorynyń jyldamdyǵy 4G-ge kóterildi.

Osy tórt aýylǵa talshyqty optıkalyq baılanys jelisin tartý jumystary jyl sońyna deıin aıaqtalmaq. Jarmysh pen Shaıyrǵa Beeline arqyly 4G qoljetimdi bolsa, Ushtaǵanǵa da Activ operatory arqyly 4G ornatyldy.

Jyńǵyldy, Shaıyr, Tuşyqudyq, Ondy aýyldaryna «Transtelekom» mekemesiniń talshyqty kabeli tartyldy. Al, Shaıyr men Jyńǵyldyǵa talshyqty baılanys júıesin tartýdyń jobalyq smetalyq qujaty daıyndaldy.

Bozdaq eldi mekenine de «Transtelekomnyń» ınterneti qosylyp, úılerge Wi-Fi ornatyldy. Al, Shetpeniń ınternetpen qamtylmaǵan shaǵynaýdandaryn ınternetpen qamtý úshin «Qazaqtelekom» AQ jumys uıymdastyryp jatyr.

Al, turǵyndar tarapynan ınternetke shuǵyl suranys bolǵan jaǵdaıda «Spetsavtomatıka» kompanııasy Wi-Fi ornatýǵa jáne ınternetpen birge radıo tolqynyn qosyp berýge daıyn. Ol úshin turǵyndardan suranys bolýy kerek.