Mańǵystaý atom energetıka kombınatyndaǵy apat: Komıssııa quramyna UQK ókilderi kiredi

ASTANA. QazAqparat – Mańǵystaý atom energetıka kombınatyndaǵy apattyń sebebin tekseretin komıssııa quramyna Ulttyq qaýipsizdik komıtetiniń ókilderi de kiredi. Bul týraly Energetıka mınıstri Almasadam Sátqalıev Úkimet otyrysynan keıin BAQ ókilderine bergen suhbatynda aıtty, dep habarlaıdy QazAqparat tilshisi.

«Memleket basshysynyń tapsyrmasy boıynsha, tıisti memlekettik komıssııa quryldy. Onyń quramyna energetıkalyq qadaǵalaý organdarynyń bári kiredi. Ol komıssııany meniń orynbasarym basqarady. Sóz joq, ol jumysqa Bas prokýratýranyń, basqa da múddeli organdardyń, jergilikti ákimdikterdegi turǵyn úı-kommnaldyq sharýashylyq bólimderiniń, naryqqa qatysýshylardyń ókilderin tartamyz. Apattyń qorytyndysy boıynsha naqty málimetti beremiz. Komıssııa faktilerdi jarııalaıdy dep oılaımyn», - dedi mınıstr.

BAQ ókilderi «Komıssııanyń quramyna Ulttyq qaýipsizdik komıtetiniń ókilderi kire me?» dep surady.

«Iá, ıá. Biraq men apat sebebin naqty aıtpas edim. Komıssııa jumysyn aıaqtaǵannan keıin aqparatyn beremiz. Bul másele búkil múddeli organdardyń baqylaýynda turǵany túsinikti», - dedi Almasadam Sátqalıev.

Eske salaıyq, keshe keshke Atyraýda birneshe shaǵynaýdanda jaryq sónip qalǵan bolatyn.

Artynsha jergilikti energetıkalyq keshenniń baspasóz qyzmeti elektr qýatynyń óshý sebebin aıtty.

Saǵat 21.30-da Atyraý oblysy ákimdigi jaryqtyń janǵanyn habarlady.

Prezıdent Qasym-Jomart Toqaev Atyraý munaı óńdeý zaýyty men Mańǵystaý atom energetıka kombınatynda týyndaǵan jaǵdaı boıynsha memlekettik komıssııa qurýdy tapsyrdy.