Mańǵystaý ákimi et baǵasyna baılanysty pikir bildirdi

NUR-SULTAN. QazAqparat – Mańǵystaý oblysynyń ákimi Nurlan Noǵaev óńirdegi et baǵasy týraly suraqtarǵa jaýap berdi, dep habarlaıdy QazAqparat.

«Aýa raıyna baılanysty jaǵdaılar ósimge áser etken joq. Iá, baǵanyń ósýi bar. Biraq jyl saıyn dástúrli túrde Mańǵystaý oblysyna et Batys Qazaqstan, Aqtóbe, Qostanaı oblystarynan jetkiziledi. ıAǵnı ettiń basym bóligi sol óńirlerden keledi», - dedi aımaq basshysy Ortalyq kommýnıkatsııalar qyzmetinde ótken baspasóz máslıhatynda.

Ákimniń aıtýynsha, bıyl bolǵan qýańshylyq pen et baǵasynyń qymbattaýy bir-birimen baılanysty emes.

«Jergilikti atqarýshy organdar baǵany negizsiz ósirmeý úshin turaqtandyrý qoryn qurdy jáne qajet bolǵan jaǵdaıda ınterventsııa jasaıdy. Baǵalarǵa jáne baǵanyń negizsiz ósýine kúndelikti monıtorıng júrgiziledi. Jedel sharalar da qabyldanýda», - dedi Nurlan Noǵaev.