Mańǵystaýlyq sharýalar mal azyǵyna sýbsıdııa surap otyr
Beki aýylynan 12 shaqyrym jerdegi sharýa qojalyǵynyń ıesi Saýalbek Jolbergenov qystyń qamyn jasap, shamasy kelgenshe qoımasyn jem-shópke toltyryp jatyr. Sharýa 20 keli kebekti-1500 teńgeden, bir túk shópti 600 teńgeden satyp alýda. Tórt túligin qystan alyp shyǵý úshin shamamen 1 myń túk shóp qajet.
— Úkimet jylma-jyl sýbsıdııasyn berip tursa jaqsy bolar edi. Byltyr mysaly berdi, ózimiz soǵan edáýir rıza boldyq. Al, bıyl toqtap qaldy. Qonys jaqsy bolsa da biz jem-shóp alamyz. Onsyz bolmaıdy. Aýa-raıynyń qalaı bolaryn eshkim bilmeıdi. Sondyqtan daıyn bolý kerekpiz, — deıdi sharýa.
«Eskeldi» sharýa qojalyǵynyń ıesi Bálıbek Esengeldıev te jem-shópke jeńildik jasalsa, sharýalarǵa úlken kómek bolatynyn aıtady. Óıtkeni, mal baǵý — shyǵyny kóp kásip. Sharýa qojalyǵyndaǵy basty másele — sý tapshylyǵy. Bálıbek Esengeldıev tirshilik nárin aýdan ortalyǵy Shetpeden tasymaldap otyr. Ol jer asty sýyn paıdalaný úshin, ár metrine 17 myń teńge tólep, 80 metr tereńdikke deıin qudyq qazdyrǵan, alaıda sý shyqpaǵan.
— Sý shyqpady, 1 mıllıon 360 myń teńgem dalaǵa ketti. Sosyn endi vodovozben tasymaldap otyrmyz. Qysqa qaraı kúnine bir vodovoz, jaz aılarynda 3 vodovoz ketedi. Basqa jer alyp, qudyq qazdyrǵym keledi. Biraq 150 metrden beride sý shyqpaıtyn sııaqty. Buryn qudyq qazdyrýdyń 20 protsentin sharýa qojalyǵy, 80 protsentin úkimet kómektesip tóleıtin edi. Qazir sony 50 de 50 qylyp tastady, ol bizge óte qıyn, — deıdi Bálıbek Esengeldıev.
Aýyl sharýashylyq mınıstrligi mal sharýashylyǵy salalaryn damytý basqarmasy basshysynyń mindetin atqarýshy Aıdos Jaqyptyń málimdeýinshe, mańǵystaýlyq sharýalarǵa mal azyǵyna sýbsıdııa berý jalǵasady.
— Mal azyǵyn sýbsıdııalaý tótenshe jaǵdaı jarııalanǵanda nemese anomaldy tabıǵı jaǵdaı týyndaǵanda ǵana beriledi. Biraq, osy qaǵıdaǵa jýyrda ózgeris engizildi. Soǵan sáıkes, Mańǵystaý, Atyraý, Qyzylorda jáne Ulytaý óńirlerindegi sharýalarǵa kómek berile beredi. Mysaly, Mańǵystaý oblysyna 1 mıllıard 200 mıllıon teńge sýbsıdııa qarastyrylǵan. Onyń 392 mıllıony byltyrǵy ótinimderge. Qalǵan 800 mıllıon teńgesine qazirgi tańda oblys ákiminiń qaýlysy daıyndalyp jatyr. Sol qaýly bekitilgennen keıin sýbsıdııa beriledi, — deıdi mınıstrlik ókili.
Buǵan deıin, Mańǵystaýda ıtbalyqtardyń jappaı qyrylýyna qatysty Ekologııa vıtse-mınıstri pikir bildirgen bolatyn.