Mańǵystaýlyq dárigerler jol apatynan aýyr jaraqat alǵan búldirshindi aman alyp qaldy

<p>AQTAÝ. KAZINFORM &ndash; Jol-kólik apaty Beıneý aýdany aýmaǵynda bolǵan. 7 jasar qyz ashyq mı jaraqaty jáne mańdaı súıegi ishke qaraı synyp, aýyr jaǵdaıda Beıneý aýdandyq ortalyq aýrýhanasyna jetkizilgen.</p>

Balanyń ómiri qyl ústinde bolǵandyqtan, oblys ortalyǵy Aqtaý qalasynan sanavıatsııamen dárigerler shaqyrtyldy.

— Balanyń jaǵdaıy tolyq tekserildi. Mıdyń aýyr ashyq jaraqatyn alǵan. Oń jaqtaǵy frontaldy súıekter synǵan. Mańdaı aımaǵynyń gemorragııalyq kontýzııasy taǵy bar. Sýbdýraldy gematoma. Pnevmotsefalııa. Travmatıkalyq jáne 3 dárejeli shok. Bala 1-dárejeli komada boldy. Saǵat 23:30 shamasynda operatsııaǵa aldyq. Ota shamamen 2 saǵatqa sozyldy, - deıdi Mańǵystaý oblystyq kópbeıindi balalar aýrýhanasynyń neırohırýrg dárigeri Erbol Kenjevalov.

Búginde búldirshinniń ómirine qaýip joq. Esin jıdy. Ázirshe dárigerlerdiń baqylaýynda bolady.

2 saǵatqa sozylǵan operatsııany neırohırýrg Erbol Kenjevalov, hırýrgter Suńǵat Batyrov pen Nurbolat Súleımenov jasady. Olarǵa anestezıolog Aıbek Nurmaǵambetov, meıirbıke Aqjonas Rakashova men anestezıolog Gúlzada Jarasova kómektesti.